ირაკლი კობახიძე: უკრაინის ხელისუფლების კონკრეტული წარმომადგენლების ერთადერთი ინტერესია, რომ როგორმე საქართველო მეორე ფრონტად აქციონ, ამას ვერ ეღირსებიან, როგორი შანტაჟიც არ უნდა განახორციელონ

საპარლამენტო უმრავლესობის ლიდერის, ირაკლი კობახიძის თქმით, მოსახლეობას არ უნდა ომი, მეორე ფრონტი და ამ პოზიციას მაქსიმალურად დავიცავთ. არის კოორდინაცია და ინტერესების თანხვედრა. ერთ მხარესაა „ნაციონალური მოძრაობა“ და მეორე მხარეს არიან – არახამია, პოდოლიაკი.

„ეს ყველაფერი არის აბსურდული და უკვე ამაზე საუბარი მომაბეზრებელიც ხდება. ყველამ ვიცით, რა ინტერესი ამოძრავებთ ამ ადამიანებს, უკრაინის ხელისუფლების კონკრეტულ ადამიანებს ვგულისხმობ და ისინი ამას არც მალავენ. მათი ერთადერთი ინტერესია, რომ როგორმე საქართველო მეორე ფრონტად აქციონ, ამას ვერ ეღირსებიან, როგორი შანტაჟიც არ უნდა განახორციელონ. ჩვენი ხელისუფლება დგას მყარად იმ ინტერესების დასაცავად, რომელიც მოსახლეობას აქვს. გვგონია, რომ მოსახლეობას არ უნდა ომი, მეორე ფრონტი და ამ პოზიციას მაქსიმალურად დავიცავთ. არის კოორდინაცია და ინტერესების თანხვედრა. ერთ მხარესაა „ნაციონალური მოძრაობა“ და მეორე მხარეს არიან – არახამია, პოდოლიაკი. ყველა მეორე ფრონტზე საუბრობს. ხდება ინტერესების თანხვედრა და სწორედ ამის გამოხატულებაა შანტაჟის ის უსუსური მცდელობა, რაც ამ სიით არის წარმოდგენილი. რაც შეეხება სანქციებს, არ ვიცი, აბსურდზე რა რეაგირება უნდა იყოს? – უკრაინის ხელისუფლებამ რაღაცა გადაწყვიტა, არიან ადამიანები, ვისაც მეორე ფრონტი სურთ. დანილოვისა და პოდოლიაკის პოზიციებზე ვცადეთ, რომ რბილად გაგვევლო, ეს ხალხი იძახდა, რომ საქართველოშიც უნდა გაჩაღდეს ომი. ამას დანილოვი და პოდოლიაკიპირდაპირ ამბობდნენ. ეს რაღაცნაირად რბილად გავიარეთ და აქაც იგივე მოგვიწევს. თუ ამ ადამიანებმა გადაწყვიტეს, რომ ჩვენი შანტაჟი სცადონ, როგორ წარმოგიდგენიათ, არახამია-პოდოლიაკი სანქციით დამემუქრონ და ამის გამო პრემიერთან დავჯდე და ომის გაჩაღებაზე სერიოზულად ვიმსჯელებ? – ეს არის აბსურდი და უსუსური მცდელობა“, – განაცხადა კობახიძემ.