მამუკა მდინარაძე რადიკალურ ოპოზიციაზე: ქვეყნის შიგნით მათი მოქმედებების „შედეგი“ ის არის, რომ „ქართულ ოცნებას“ რეიტინგი ეზრდება, მაგრამ ქვეყნის გარეთ საქართველოს მოქალაქისა და ჩვენი ქვეყნის საერთაშორისო იმიჯი ზიანდება

4-მა პარტიამ, დეკლარირებულად განაცხადა (მაინც ერთად არიან, მაინც „ნაციონალურ მოძრაობის“ დავალებებს ასრულებენ) და გადაწყვიტა, რომ ბარემ ერთად იმოქმედონ. არ არსებობს „ლელო“, „სტრატეგია აღმაშენებელი“, „დროა“ და „გირჩი“, არსებობს ერთი პარტია „ნაცმოძრაობა“, რომელიც საქართველოს წინააღმდეგ დავალებებს ასრულებს, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ პარტიის ცენტრალურ ოფისში საპარლამენტო უმრავლესობის სხდომის დასრულების შემდეგ განაცხადა.

„აქედან გამომდინარე, ისინი ცალკე იქნებიან, ერთად თუ ა.შ. ისინი არიან ერთნი და აკეთებენ ერთ საქმეს, რასაც საქართველოს საწინააღმდეგო საქმე ჰქვია. ქვეყნის შიგნით რასაც ისინი აკეთებენ, ვერაფრით ვნებენ ხელისუფლებას, პირიქით რაც არ უნდა მათთვის სამწუხარო იყოს, „სიარარსის“ და „ენდიაის“ კვლევამაც აჩვენა, „ქართული ოცნების“ რეიტინგი არის გაზრდილი. „სიარარსის“ კვლევაშიც კი ყველა ამ პარტიის ერთად აღებულზე მეტი გვაქვს რეიტინგი. ქვეყნის შიგნით მათი ამ ქმედებების „შედეგი“ ის არის, რომ „ოცნებას“ რეიტინგი ეზრდება, მაგრამ ცუდი ის არის, რომ ქვეყნის გარეთ ზიანდება საქართველოს მოქალაქის და ჩვენი ქვეყნის საერთაშორისო იმიჯი. ისინი აზიანებენ საქართველოს ქვეყნის ფარგლებს გარეთ და ეს არის ყველაზე სამწუხარო. ეს არის ქვეყნის მტრობა და უსამშობლოობა“, – განაცხადა მდინარაძემ.

ოპოზიციის ნაწილი პროევროპული მოძრაობის შესაქმნელად ემზადება. დღეს ინიციატივა „სტრატეგია აღმაშენებელმა“ დააანონსა. პარტნიორებად, გიორგი ვაშაძის გუნდი, ელენე ხოშტარიას „დროას“, ხაზარაძე-ჯაფარიძის „ლელოს“ და ზურაბ ჯაფარიძის პარტიას „გირჩი მეტი თავისუფლებას“ განიხილავს.