მამუკა მდინარაძე რადიკალურ ოპოზიციას: თქვენი შიდა თამაშები შიგნით შეინახეთ. როგორც უბრახუნებთ ერთმანეთს, გააგრძელეთ ბრახუნი, აქ სიტყვების უაზრო ბრახუნს თავი დაანებეთ - კარგს კარგი დაარქვით

თქვენი შიდა თამაშები შიგნით შეინახეთ. როგორც უბრახუნებთ ერთმანეთს, გააგრძელეთ ბრახუნი, აქ სიტყვების უაზრო ბრახუნს თავი დაანებეთ - კარგს კარგი დაარქვით. ამასობაში რეალური პრობლემები კადრს მიღმა რჩება, - ასე მიმართა ფრაქცია „ქართული ოცნების“ თავმჯდომარემ, მამუკა მდინარაძემ პარლამენტში გამოსვლისას რადიკალურ ოპოზიციას.

მამუკა მდინარაძემ მოუწოდა ოპოზიციას რეალურ პრობლემებზე კონცენტრირდნენ. მისივე თქმით, ოპოზიცია რადიკალიზმითაა დაკავებული და ხალხი მათ სულ არ აინტერესებთ.

„ჩემი თანაგუნდელების თეზისებს ვიღებ და ვმეცადინეობ, რომ კარგად გამოვიდე და თქვენ გამხილოთ კარგად. გუშინ, საღამოს შევიკეტეთ 10 დეპუტატი და ვიმეცადინეთ, დღეს გამოვდივართ და სიმართლეს გეუბნებით.

რადგან თქვენ ჩვენზე რეალურ ინფორმაციას არ ფლობთ და ზღაპრებს ჰყვებით, მე ზღაპრებს ნამდვილად ვერ მოვყვები, თქვენთან რა ხდება, იმას გეტყვით. სამი „შიდა კლანიდან“ ერთის მეთაურმა დაავალა დღეს ისტერიკაში ჩავარდნილ ადამიანებს, რომ თქვენ უნდა დაიკავოთ რადიკალური ნიშა, წყნარად რომ ხართ პარლამენტში, ხომ ხედავთ „მელიას კლანი“ როგორ გჯობნით და ტყუილად გაძლევთ ფულსო.

დღეს ისეთი ადამიანი გაგიჟდა, რომელსაც ორი წელია, ხმა არ ამოუღია. დღეს ჩავარდა ისტერიკაში თურმე, ხალხის ბედი არ გაწუხებთო. არ არსებობს იმაზე მეტი მდაბიო პოპულიზმი, მიუტრიალდე წარმატებულ ადამიანს და უთხრა, შენ მდიდარი ხარ და სადაც მაჟორიტარი ხარ, იქ ადამიანებს უჭირს. დიახ, ჯერ კიდევ ძალიან ბევრ ადამიანს უჭრის, მაგრამ არა ისე, როგორც თქვენ დროს! საერთოდ არავინ აქცევდა ყურადღებას. ახლა რომ უჭირს, ვიღაცა ყურადღებას აქცევს, მის გადაწყვეტის გზებზე საუბრობს და განახორციელებს. ამ პროგრამაზე ვსაუბრობთ და კაციშვილს არ გახსენებია, რეალურ ხარვეზებზე რომ ისაუბროს. მინისტრს ხომ არ უთქვამს, რომ იდეალური პროგრამაა. ვერ იქნება, უამრავი ხარვეზია, ახალია, „ნოუ ჰაუა“.

გამორიცხულია, უხარვეზო იყოს. იმ ხარვეზსაც ასწორებენ, თქვენ ამაზე საუბარი არ გინდათ, გადასულები ხართ რომელი აჯობებთ ერთმანეთს რადიკალიზმში შიგნით. ამ დროს ეს ხალხი გისმენთ, სულ არ აინტერესებთ კირკიტაძე-ხაბეიშვილი აჯობებს, თუ თქვენი კლანის რომელიღაც წარმომადგენელი, თუ „მიშას სასტავიდან“ ვიღაც გამოვა და უფრო რადიკალური იქნება, უფრო მეტად მიახურავს ვიღაცას. ამაზე ხართ გადასული, ეს თქვენი შიდა თამაშები შიგნით შეინახეთ. როგორც უბრახუნებთ ერთმანეთს გააგრძელეთ ბრახუნი, აქ სიტყვების უაზრო ბრახუნს თავი დაანებეთ. კარგს კარგი დაარქვით. ამასობაში რეალური პრობლემები კადრს მიღმა რჩება“, - აღნიშნავს მდინარაძე.

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, პარლამენტში, ინტერპელაციის წესით, საზოგადოებრივ სამუშაოებზე დასაქმების მასშტაბურ პროგრამასთან დაკავშირებით კითხვებს პასუხობს.