რატი ბრეგაძე: დეოლიგარქიზაციის კანონპროექტში არცერთი ნიშანი ბიძინა ივანიშვილს არ ერგება და ვისაც ერგება, ოპოზიცია ხედავს, შესაბამისად, მათ არ სურთ, რომ თავის დამფინანსებელთან რაიმე ფორმით ურთიერთობა შეეზღუდოთ

ოპოზიციას ეს კანონპროექტი [დეოლიგარქიზაციის შესახებ] არ მოეწონა, გამომდინარე იქიდან, რომ მათ შესაძლოა აქ ამოიკითხეს მათი ერთ-ერთი მხარდამჭერი და დამფინანსებელი ბატონი დავით კეზერაშვილი. მათ რა თქმა უნდა არ სურთ, რომ შეუწყდეთ დაფინანსების წყარო და შემდგომ ჰქონდეთ ამ ადამიანთან ნებისმიერი კავშირის დეკლარირების ვალდებულება, - ამის შესახებ იუსტიციის მინისტრმა რატი ბრეგაძემ გადაცემა „იმედი LIVE“-ში განაცხადა. მისი თქმით, მიუხედავად ოპოზიციის განცხადებებისა, არ არსებობს არცერთი კრიტერიუმი იმის, რომელსაც ამ კონტექსტში ბიძინა ივანიშვილი აკმაყოფილებს.

„ის კანონი, რომელიც შეეხება დეოლიგარქიზაციას, აქ აღებულია უკრაინული მოდელი, რომელშიც გათვალისწინებულია ქართული ელემენტები, თუმცა უკრაინულ კანონში არის საინტერესო ჩამონათვალი კრიტერიუმებისა, რომელსაც უნდა აკმაყოფილებდეს ადამიანი, იმისთვის, რომ მას ეწოდოს ოლიგარქი. პირველი - ადამიანი უნდა ფლობდეს, დაახლოებით 80 მილიონი დოლარის ქონებას, მას უნდა ჰქონდეს გავლენა პოლიტიკაზე, გავლენა მედიაზე და უნდა ეწეოდეს პრაქტიკულად მონოპოლიურ საქმიანობას. ამ შემთხვევაში შესაძლოა დადგეს სამართლებრივი შედეგები. ოპოზიციას ეს კანონპროექტი არ მოეწონა, გამომდინარე იქიდან, რომ მათ შესაძლოა აქ ამოიკითხეს მათი ერთ-ერთი მხარდამჭერი და მათ შორის დამფინანსებელიც, რომელიც იყო თავდაცვის მინისტრი და მინისტრობის შემდგომ მყისიერად გამილიარდერებული ბატონი დავით კეზერაშვილი. მათ რა თქმა უნდა არ სურთ, რომ შეუწყდეთ დაფინანსების წყარო და შემდგომ ჰქონდეთ ამ ადამიანთან ნებისმიერი კავშირის დეკლარირების ვალდებულება. როდესაც ეს ადამიანები საუბრობენ ბატონ ივანიშვილზე, ბატონი ივანიშვილი მართალია იყო „ქართული ოცნების“ დამფუძნებელი და მისი თაოსნობით მოხდა 2012 წელს ეს მშვიდობიანი გარდატეხა, რამაც ქვეყნის ისტორიაში ძალიან დიდი დემოკრატიული გარდატეხა შეიტანა. შემდგომში ეს ადამიანი, როგორც ყველამ იხილა, გავიდა პოლიტიკიდან, ეწევა კერძო საქმიანობას და არცერთი ნიშანი, რომელიც აქ არის, ამ ადამიანს არ ერგება და ვისაც ერგება, ბუნებრივია ხედავს ამას ოპოზიცია და შესაბამისად არ სურთ, რომ თავის დამფინანსებელთან და უპირობო მხარდამჭერთან რაიმე ფორმით ურთიერთობა შეეზღუდოთ“, - განაცხადა ბრეგაძემ.