ნიკოლოზ სამხარაძე: ძალიან ბევრი მადლობა მივიღეთ უკრაინული დელეგაციისგან იმ დახმარებისთვის, რომელსაც საქართველო უწევს უკრაინას საერთაშორისო პლატფორმებზე

ძალიან ბევრი მადლობა მივიღეთ უკრაინული დელეგაციისგან იმ დახმარებისთვის, რომელსაც საქართველო უწევს უკრაინას საერთაშორისო პლატფორმებზე და გვთხოვეს, რომ ეს დახმარება აუცილებლად გაგრძელდეს, რადგან უკრაინისთვის მნიშვნელოვანია საქართველოს ასეთი მხარდაჭერა დიპლომატიურ ფრონტზე, - ამის შესახებ საქართველოს პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.

მისი თქმით, სხვა საკითხებთან ერთად, შეხვედრაზე საუბარი შეეხო მიხეილ პოდოლიაკის გუშინდელ განცხადებას, რომელიც, მისივე განმარტებით, არ უწყობს ხელს ქართულ-უკრაინულ ურთიერთობებს.

ნიკოლოზ სამხარაძის განმარტებით, უკრაინის რადას პირველმა ვიცე-სპიკერმა განაცხადა, რომ პოდოლიაკს აქვს მრჩევლის სტატუსი და ის ვერ იქნება უკრაინის ოფიციალური პოზიციის გამხმოვანებელი.

„ძალზედ საინტერესო და მეგობრული შეხვედრა გვქონდა უკრაინის საპარლამენტო დელეგაციასთან, რომელსაც რადას პირველი ვიცე-სპიკერი ხელმძღვანელობს. გვქონდა შესაძლებლობა, რომ გვესაუბრა არა მხოლოდ იმ საკითხებზე, რომელშიც ერთიანი ვართ და ერთიანი პოზიციებით გამოვდივართ, არამედ თუნდაც ისეთ საკითხებზე, რაც დღეს გახდა ცნობილი, კერძოდ პოდოლიაკის განცხადებაზე, რომელიც ნამდვილად არ უწყობს ხელს ქართულ-უკრაინულ ურთიერთობებს. ძალიან ბევრი მადლობა მივიღეთ უკრაინული დელეგაციისგან იმ დახმარებისთვის, რომელსაც საქართველო უწევს უკრაინას საერთაშორისო პლატფორმებზე და გვთხოვეს, რომ ეს დახმარება აუცილებლად გაგრძელდეს, რადგან უკრაინისთვის მნიშვნელოვანია საქართველოს ასეთი მხარდაჭერა დიპლომატიურ ფრონტზე. ასევე ვისაუბრეთ საპარლამენტო ურთიერთობების კიდევ უფრო მეტად გაღრმავებაზე. ასევე ვისაუბრეთ მოახლოებულ ყირიმის პლატფორმის საპარლამენტო განზომილებაზე, სადაც საქართველო აუცილებლად მიიღებს მონაწილეობას და ეს ფორუმი გაიმართება ოქტომბრის ბოლოს. ვისაუბრეთ უკრაინელი ლტოლვილების მდგომარეობაზე საქართველოში. მათ ძალიან დიდი მადლობა გადაგვიხადეს იმ ყურადღებისთვის, რასაც ჩვენი ქვეყანა მათ მიმართ გამოხატავს. საუბარი იყო სანქციებზე. სანქციების გვერდის ავლის საშიშროებაზე რუსეთის მხრიდან. შევთანხმდით იმაზე, რომ თუ ვინმეს რამე ინფორმაცია ექნება სანქციების შესაძლო გვერდის ავლასთან დაკავშირებით, ეს ინფორმაცია პირდაპირ ჩვენ მოგვაწოდონ და რა თქმა უნდა, ჩვენ მყისიერ რეაგირებას მოვახდენთ. ფაქტობრივად შევთანხმდით იმაზე, რომ აქამდე არანაირი ფაქტი იმის, რომ სანქცირებული პროდუდუქცია, ან სანქცირებულ კომპანიებს საქართველოს გვერდის ავლით რამე ურთიერთობები დაემყარებინათ რუსეთთან, ასეთი რამე არ ყოფილა. შეხვედრას ძალიან პოზიტიურად შევაფასებდი, ძალიან მეგობრული შეხვედრა იყო და უკრაინას დავუდასტურეთ სრული მხარდაჭერა მათ ბრძოლაში რუსეთის აგრესიის წინააღმდეგ“, - განაცხადა ნიკოლოზ სამხარაძემ.