ნორვეგიის საგარეო საქმეთა მინისტრი: ნორვეგია სრულად უჭერს მხარს საქართველოს სუვერენიტეტს, ტერიტორიულ მთლიანობას, თქვენი ქვეყნის ევროპულ და ევროატლანტიკურ მისწრაფებას - მივესალმებით საქართველოს პოლიტიკურ გზას დეესკალაციისკენ

„ბედნიერი ვარ, რომ ოფიციალურად გაიხსნა ნორვეგიის საელჩო თქვენს ლამაზ ქვეყანაში. აღსანიშნავია, რომ ჩვენს ქვეყნებს შორის არაჩვეულებრივი, მეგობრული ურთიერთობაა. მოხარული ვარ თქვენი მეგობრული დახვედრის. ნორვეგია სრულად უჭერს მხარს საქართველოს სუვერენიტეტსა და ტერიტორიულ მთლიანობას, ასევე - თქვენი ქვეყნის ევროპულ და ევროატლანტიკურ მისწრაფებას“, - განაცხადა ნორვეგიის სამეფოს საგარეო საქმეთა მინისტრმა ქართველ კოლეგასთან შეხვედრის შემდეგ.

ანიკენ ჰუიტფელდმა ხაზი გაუსვა, რომ ნორვეგია საქართველოს სუვერენიტეტისა და ტერიტორიული მთლიანობის ერთგული რჩება. მინისტრის თქმით, დეესკალაციისკენ მიმართული პოლიტიკური გზა მართებულია.

„შეხვედრაზე ჩვენ ვისაუბრეთ სამომავლო ურთიერთობებზე, მათ შორის - უსაფრთხოების საკითხებში. ასევე, ვისაუბრეთ ოკუპირებულ ტერიტორიებზე არსებულ სიტუაციასა და საქართველოს მონაწილეობაზე გლობალური უსაფრთხოების მისიებში. ჩვენ ვაგრძელებთ თანამშრომლობას აფხაზეთისა და სამხრეთ ოსეთის საკითხებზე. რუსული პოლიტიკა, რომელიც ამ რეგიონების მიმართ ხორციელდება, აბსოლუტურად მიუღებელია. მივესალმებით საქართველოს პოლიტიკურ გზას დეესკალაციისკენ, ასევე - ჟენევის ფორმატში მოლაპარაკებების პროცესს. კიდევ ერთხელ მოვუწოდებთ რუსეთს, შეასრულოს 6-პუნქტიანი შეთანხმება, რომელიც 2008 წელს გაფორმდა“, - განაცხადა ნორვეგიის საგარეო საქმეთა მინისტრმა.

თბილისში ნორვეგიის საგარეო საქმეთა მინისტრის ვიზიტი დაიწყო. ანიკენ ჰუიტფელდი ქართველო კოლეგას, ილია დარჩიაშვილს შეხვდა, რის შემდეგაც მინისტრები ნორვეგიის სამეფოს საელჩოს გახსნის ოფიციალურ ცერემონიას დაესწრნენ.