ავთანდილ ხურციძის დედა: ჩემს შვილს სახელმწიფო ყურადღებას არ აქცევს

აშშ-ში დაკავებული ქართველი სპორტსმენის, ავთანდილ ხურციძის დედა გუშინდელი სასამართლო პროცესით იმედგაცრუებულია. მაყვალა ხურციძის განცხადებით, მას მოლოდინი ჰქონდა, რომ ავთანდილ ხურციძეს სასამართლო გუშინ დარბაზიდან გაათავისუფლებდა, თუმცა პროცესი კიდევ რამდენიმე თვით გადაიდო. ინფორმაციას ipn-ი ავრცელებს.

მაყვალა ხურციძის განცხადებით, მის შვილს სახელმწიფო ყურადღებას არ აქცევს და შესაბამისად, მისი უდანაშაულობის დამტკიცება გაჭიანურდა. ამასთან მისი თქმით, ადვოკატის დაქირავება თავად მოუხდათ.

„ადვოკატის მომსახურება, რომელიც იმ ქვეყანაში ძალიან ძვირი ღირს, სამეგობროში აკრებილი ფულით მოვახერხეთ. ისე ვერ შევძლებდით ელემენტარულად ადვოკატის დაქირავებასაც კი. ნუთუ ჩემს შვილს საქართველოსთვის ამაგი არ აქვს“, - ამბობს დაკავებულის დედა. ის იმედს გამოთქვამს, რომ „სახელმწიფო დაინტერესდება წარმატებული ქართველი სპორტსმენის ბედით, წინააღმდეგ შემთხვევაში, მისი კარიერა განწირულია.

გუშინ აშშ-ში დაკავებული ქართველი სპორტსმენის ავთანდილ ხურციძის სასამართლო პროცესი ნოემბრამდე გადაიდო.

ქართველი სპორტსმენები - ავთანდილ ხურციძე და ლევან მაყაშვილი, აშშ-ში საქართველოს სხვა მოქალაქეებთან ერთად, ე.წ. ქურდულ სამყაროსთან კავშირის, თაღლითობის მომზადებისა და რეკეტში მონაწილეობის ბრალდებით 8 ივნისს დააკავეს.

ავთანდილ ხურციძეს სასამართლომ ორთვიანი წინასწარი პატიმრობა შეუფარდა. მაყაშვილი კი 13 ივნისს, ერთი პირის თავდებობისა და გირაოს სანაცვლოდ გაათავისუფლეს.

ავთანდილ ხურციძე ბრუკლინში მდებარე საპატიმროში იმყოფება.