დავით უსუფაშვილი: სააკაშვილი ევრაზიული მასშტაბის ავანტიურისტად ჩამოყალიბდა

დავით უსუფაშვილი მიხეილ სააკაშვილს ევრაზიული მასშტაბის პოლიტიკურ ავანტიურისტს უწოდებს. ამის თაობაზე „შენების მოძრაობის“ ლიდერმა დღეს ჟურნალისტებს განუცხადა.

„არსებობენ სოფლის დონის ავანტიურისტები, რეგიონის დონის, ქალაქის დონის. მიხეილ სააკაშვილი ჩამოყალიბდა ევრაზიული მასშტაბის პოლიტიკურ ავანტიურისტად, რომელსაც ერთადერთი მიზანი აქვს - საკუთარი ინტერესების დაკმაყოფილება. ამის გამო ის მზად აღმოჩნდა საქართველო მიეყვანა უფსკრულის პირას, შემდგომ ის უკრაინაში გადავიდა და ახლა როგორც მის ქმედებებს ეტყობა, იგი მზადაა უფსკრულის პირას მიიყვანოს ეს ქვეყანაც საკუთარი პატივმოყვარეობის დასაკმაყოფილებლად“, - ამბობს უსუფაშვილი.

პოლიტიკოსი ხელისუფლებას სააკაშვილთან დაკავშირებით რჩევასაც აძლევს. „მე მგონი, ჩვენ მას უბრალოდ თავი უნდა დავანებოთ. ვიდრე მასზე ვსაუბრობთ, სიუჟეტებს ვამზადებთ, კომენტარებს ვაკეთებთ, ეს სწორედ მის ავანტიურიზმს კვებავს და ახალ-ახალ სიურპრიზებს მოამზადებს. საკმაოდ სახიფათო საკითხებთან გვაქვს საქმე და მე ვისურვებდი, რომ ამ საქმეს საქართველოს მთავრობა მეტი თანმიმდევრულობით და კეთილგონიერებით ეპყრობოდეს“, - აცხადებს ახალი პოლიტიკური ჯგუფის ლიდერი.

მიხეილ სააკაშვილი აცხადებს, რომ ის პოლონეთიდან უკრაინაში ჩასვლას 10 სექტემბერს აპირებს და მას აეროპორტში უკრაინის მთელი ოპოზიციური სპექტრი დახვდება, მათ შორის იქნება იულია ტიმოშენკოც.

უკრაინის ოდესის ოლქის ყოფილ გუბერნატორს, მიხეილ სააკაშვილს 26 ივლისს უკრაინის საიმიგრაციო სამსახურმა ქვეყნის მოქალაქეობა ჩამოართვა. მიხეილ სააკაშვილმა უკრაინის მოქალაქეობა 2015 წლის 29 მაისს, უკრაინის პრეზიდენტის ბრძანების შემდეგ მიიღო, რის გამოც რამდენიმე თვეში დაკარგა საქართველოს მოქალაქეობა.

დღეს Facebook-ის პირად გვერდზე სააკაშვილმა დაწერა, რომ უკრაინაში ჩასვლას ის უმცროს შვილთან ერთად გეგმავს.