რეალობას აცდენილი ანგარიში, რომელიც ევროპარლამენტარმა სვენ მიქსერმა მოამზადა

საქართველოს მიერ ევროკავშირის ასოცირების შეთანხმების შესრულების წლიური ანგარიშის თავდაპირველ ვერსიაში შესწორებები გაჩნდა. დოკუმენტს, რომელიც ესტონელი პარლამენტარის, სვენ მიქსერის ავტორობით მომზადდა, საგარეო კომიტეტი 2 დღეში განიხილავს, ევროპარლამენტის პლენარულ სხდომაზე კი 21 ნოემბერს გავა.

ეს შესწორებები ფაქტობრივად იმეორებს იმ რეზოლუციის პათოსს, რომელიც ევროპარლამენტმა ივნისში მიიღო და რომელსაც მმართველმა გუნდმა დაუსაბუთებელი, მძიმე და ყალბ ანგარიშებზე დაფუძნებული უწოდა. უცვლელია შესწორებების ავტორთა ვინაობაც - მათ შორის ანდრიუს კუბილიუსი, ანა ფოტიგა, რასა იუკნევიჩიენე. მაგალითად, შესწორება 135, რომელიც დოკუმენტში ანდრიუს კუბილიუსის და რასა იუკნევიჩიენეს მოთხოვნით შევიდა და სადაც საქართველოს ხელისუფლებას იმ ადამიანების სამართლებრივი დევნის შეწყვეტისკენ მოუწოდებენ, რომელთა მიმართაც არსებობს სასამართლო გადაწყვეტილებები და რომლებიც მედიამენეჯერის ან დემოკრატიისთვის მებრძოლთა სტატუსს არიან ამოფარებულნი.

"სინანულს გამოვთქვამთ კრიტიკული მედიის მთავარი არხის დირექტორის ნიკა გვარამიას, სხვა კრიტიკული მედიასაშუალებების დამფუძნებლებისა და დირექტორების, კერძოდ, „ტვ ფორმულას“ დამფუძნებლის, დავით კეზერაშვილისა და ტელეკომპანია „პირველის“ დამფუძნებლისა და დირექტორის ვახტანგ წერეთლის დევნის გამო, ასევე ცილისწამების გამო კრიტიკული მედიისთვის სასამართლოში ჩივილის პრაქტიკაზე, როგორც დამოუკიდებელ მედიაზე პოლიტიკური ზეწოლის ინსტრუმენტზე", - წერია ანგარიშის სამუშაო ვერსიაში.

ანგარიშის სამუშაო ვერსიაში ასევე გაჩნდა ევროპარლამენტარ ანნა ფოტიგას ინიციატივა, რომ 107-ე შესწორებაში შეიცვალოს მერვე პუნქტის თავდაპირველი შინაარსი და იქ, სადაც წერია, რომ საქართველომ გაითვალისწინოს ევროკომისიის რეკომენდაცია და ყველაფერი გააკეთოს იმისთვის, რომ აღმოიფხვრას კერძო, მათ შორის ოლიგარქების განსაკუთრებული ინტერესების გავლენა ეკონომიკურ, პოლიტიკურ და საზოგადოებრივ ცხოვრებაში ანნა ფოტიგას და კიდევ რამდენიმე ევროპარლამენტარის ინიციატივაა, დაკონკრეტდეს და ჩაიწეროს მხოლოდ ბიძინა ივანიშვილი. საინტერესოა ასევე დოკუმენტის სამუშაო ვერსიაში 103-ე შესწორების მეშვიდე პარაგრაფი, სადაც წერია: "შეშფოთებული ვართ მმართველი პარტიის მიერ საარჩევნო რეფორმების სამუშაო ჯგუფში სამართლიანი არჩევნებისა და დემოკრატიის საერთაშორისო საზოგადოების ( ISFED) ჩართვაზე უარის გამო; სრულ ნდობას ვუცხადებთ ISFED-ის მიერ საქართველოში საარჩევნო პროცესების მონიტორინგს და ანგარიშებს". ნდობას უცხადებენ იმ ორგანიზაციას, რომელმაც უხეში „შეცდომა“ დაუშვა 2020 წლის არჩევნების მონიტორინგში და ამ ინფორმაციას ISFED-ის დირექტორი 40 დღე მალავდა, რამაც ქვეყანაში პოლიტიკური პროცესების რადიკალიზაციას შეუწყო ხელი. ისფედის აღიარების შემდეგ კი სააკაშვილსა და მის თანამოაზრე რადიკალებს რევოლუციური სცენარისთვის ხელიდან უკანასკნელი ბერკეტიც გამოეცალათ.

ვრცლად ნახეთ „იმედის კვირის“ რეპორტაჟი.