ირაკლი ქადაგიშვილი: ბოლო პერიოდში რეზოლუციები არის აბსტრაქტული, არაფრის მთქმელი და სამართლებრივ საფუძველს მოკლებული

ბოლო პერიოდში რეზოლუციები არის აბსტრაქტული, არაფრის მთქმელი და სამართლებრივ საფუძველს მოკლებული, - ამის შესახებ საპარლამენტო უმრავლესობის წევრმა ირაკლი ქადაგიშვილმა განაცხადა.

„ვხედავთ, რომ რეზოლუციები ამ ბოლო პერიოდში არის აბსტრაქტული, არაფრის მთქმელი და სამართლებრივ საფუძველს მოკლებული, პოლიტიკური განცხადებებით სავსე. როდესაც საუბარია, რომ შევამციროთ ბიძინა ივანიშვილის გავლენა საზოგადოებაზე, პოლიტიკაზე, ეკონომიკაზე, როგორ შევამციროთ? რა მეთოდს გვთავაზობენ ამისთვის? ეკონომიკურ საქმიანობას საქართველოში არ ეწევა და არანაირ მოგებას ქართულ ეკონომიკაში არ იღებს. გვეუბნებიან, რომ საქართველოს სასამართლო და სისხლის სამართლის კოდექსი გვერდზე გადადეთ და მიიღეთ პოლიტიკური გადაწყვეტილებები. ვერ გავიგეთ ჩვენ სასამართლოს მშენებლობას დავუთმოთ დრო თუ მის გვერდის ავლით მივიღოთ გადაწყვეტილებები ამა თუ იმ საქმეზე?! თუ ვინმე იტყვის, რომ ნიკა გვარამიას ან სხვების მიმართ სასამართლომ უკანონოდ იმოქმედა, მაშინ გასაგები იქნება კიდევ, მაგრამ უნდა დაასაბუთონ რაშია უკანონო ქმედება. რაც შეეხება სააკაშვილს, კარგად ვიცით, რომ ის გარკვეული მისიით შემოაგზავნეს საქართველოში. მან ეს ვერ შეასრულა და მის მერე წელიწადზე მეტია, ეს ადამიანი ფაქტობრივად ითხოვს, რომ როგორც შემომიყვანეთ, ისე გამიყვანეთ უკანო და ამისათვის ყოველთვე ახალ-ახალ მიზეზებს იგონებს“,- აღნიშნა ქადაგიშვილმა.

ევროპარლამენტის საგარეო ურთიერთობათა კომიტეტმა მხარი დაუჭირა სვენ მიქსერის ანგარიშის კომპრომისულ ვარიანტს საქართველოს მიერ ასოცირების ხელშეკრულების შესრულების შესახებ.