მაია ბითაძე: მოქალაქეებს ძალიან მოჰბეზრდათ გაკოტრებული პოლიტიკური პარტიების მხრიდან იმის მოსმენა, რომ ვიღაც უნდა გამოვიდეს ქუჩაში, რათა ოპოზიცია მოვიდეს ხელისუფლებაში

საქართველოს მოქალაქეებს ძალიან მოჰბეზრდათ გაკოტრებული პოლიტიკური პარტიების მხრიდან იმის მოსმენა, რომ ვიღაც უნდა გამოვიდეს ქუჩაში, რათა ოპოზიცია მოვიდეს ხელისუფლებაში. ამისთვის არსებობს არჩევნები და მოსახლეობის ეს განწყობა კარგად შეიმჩნევა სხვადასხვა კვლევაში, სადაც რეგრესისკენ მიდის პოლიტიკური ოპოზიციის რეიტინგები, ზოგიერთს ნულიც კი არ უწერია, - ამის შესახებ „ქრონიკის“ ეთერში გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ განაცხადა.

„მთელი ეს პროცესი, რომელიც დაიწყო ქუჩის აქციების დაანონსებით, ოპოზიციის ჯერ გაერთიანებით და მერე დაშლით, შემდეგ აქცია-პერფორმანსებით, ეს ციკლი გავიარეთ და მოსახლეობამ დაინახა, რომ ეს ყველაფერი ემსახურება ერთ მიზანს - საქართველოს პოლიტიკური იმიჯი საერთაშორისო მასშტაბით შერყეულიყო. თუ ვინმე გაბრაზებულია დღეს, ეს არის მოსახლეობის საღი ნაწილი, რომელიც ფიქრობს, რომ ოპოზიციამ გააკეთა ისე, რომ დღეს ჩვენ გვაქვს ევროპული პერსპექტივა, და არა კანდიდატის სტატუსი. პირნათლად ვასრულებთ ასოცირების ხელშეკრულებას, ბევრად წინ ვართ უკრაინასა და მოლდოვაზე, თუმცა იმის გამო, რომ აქ შეიქმნა პოლიტიკური რადიკალიზაციის ძალიან მაღალი ხარისხი, პოლიტიკური სპეკულაციები, შანტაჟი, საბოტაჟი, დღეს გვაქვს მხოლოდ ევროპული პერსპექტივა. როგორც პოლიტიკოსი გეტყვით, რომ პოლიტიკური ცხოვრებისთვის ძალიან კარგია ჯანსაღი ოპოზიციის არსებობა. მივესალმები ყველა იმ ოპოზიციონერს, რომელიც ერთვება საკითხების არსებით განხილვაში. დანარჩენი ოპოზიცია, რომელიც დადის ბრიუსელში და ძირს უთხრიან ჩვენს ქვეყანას, მათი პოლიტიკური კარიერა დაღმავლობისკენ მიემართება და ეს კიდევ ერთხელ გახდა თვალნათელი ბოლო შუალედურ არჩევნებზე. კიდევ ერთხელ მინდა მოვუწოდო პოლიტიკოსებს, რომლებიც ხალხს ქუჩაში გამოსვლისკენ მოუწოდებენ და ასე სურთ ხელისუფლების ძალით დამხობა, ეს სიმღერა ბევრჯერ იქნა ნამღერი, ეს გზა ბევრჯერ გავიარეთ. ერთადერთი გზა გადის მშვიდობაზე, ეკონომიკურ აღმავლობაზე და არჩევნებზე, რომელიც გველის წინ“, - აცხადებს მაია ბითაძე.