ოლივერ ვარჰეის გზავნილები ოპოზიციის წევრებმა შეაფასეს

ოლივერ ვარჰეის გზავნილები ოპოზიციის წევრებმა შეაფასეს. ოპოზიციის ნაწილი ფიქრობს, რომ სახელმწიფოებრივად მათთვის ძალიან მნიშვნელოვანი იყო ის, რაც ევროკომისარმა გუშინ თქვა და დღეს კი სოციალურ ქსელში გაიმეორა.

„ოლივერ ვარჰეი აქ იყო ჩამოსული როგორ ევროკომისარი და მისი მთავარი გზავნილი იყო, რომ ის იქნება მთავარი ლობისტი საქართველოს ევროპულ გზაზე და მხარს დაუჭერს სტატუსის მინიჭებას. ჩემთვის ეს არის უმნიშვნელოვანესი და ყველაზე მთავარი გზავნილი ქვეყნის ინტერესებიდან გამომდინარე, - ამის შესახებ „რესპუბლიკური პარტიის“ ერთ-ერთმა ლიდერმა, ხათუნა სამნიძემ განაცხადა.

„ბატონმა ვარჰეიმ გვითხრა საჯაროდ, რომ არის მზად, ევროპაში არის განწყობა, რომ დაგიჭიროთ მხარი, რომ მიიღოთ კანდიდატის სტატუსი, მაგრამ ამისთვის თქვენ უნდა გადადგათ კონკრეტული ნაბიჯები. პირველი, რომ დასხდეთ და ერთად იმუშაოთ სამუშაო ჯგუფებთან და მეორე, რეალურად უნდა შევასრულოთ 12 პუნქტი. ეს გვითრხა და ეს უნდა გავაკეთოთ“, - განაცხადა პარტია „მოქალაქეების“ ლიდერმა ალეკო ელისაშვილმა.

„გირჩში“ ფიქრობენ, რომ ახლა უფრო თამამად აუხსნიან საკუთარ კოლეგებს, რომ მათი პოზიცია 12 პუნქტის შესრულების პროცესში არასწორია.

„ბატონი ვაჰეის ვიზიტი კარგი იყო ძალიან იმიტომ, რომ ჩვენ ეს 5 თვე ისე ეფექტურად ვერ გავლიეთ 12 პუნქტის შესრულებაში, როგორც ალბათ კარგი იქნებოდა. შეიძლება გვეფიქრა, რომ ჩვენ მიმართ გული ხომ არ აუცრუვდათ ჩვენს ევროპელ მეგობრებს. როდესაც ასეთი მაღალი თანამდებობის პირი ჩამოდის და კიდევ ერთხელ გიმტკიცებს, რომ ის მზად არის გემუშაოს, ეს კიდევ ერთხელ ხაზს უსვამს იმას, რომ ჩვენს მეგობრებს არ მივუტოვებივართ. მთავარი არის ის, რომ ის ჩამოვიდა იმავე მესიჯით, რასაც ამდენი ხანი გვეუბნება ევროპა, რომ მთავარია ერთად ვიმუშაოთ და ის ჩამოვიდა მესიჯით, რომ ახლა გაქვთ ერთი შანსი. მთავარი რაც მისი განცხადებიდან გამოვიტანე არის ეს და ამ განცხადებით ზურგგამაგრებული კიდევ ერთხელ ვეცდები, მათ შორის ჩემი პარტიაც, რომ ზეწოლა მოვახდინოთ იმ ოპოზიციონერებზე, რომლებიც არ იღებენ მონაწილეობას მთელ ამ პროცესში“, - განაცხადა „გირჩის“ წევრმა ჰერმან საბომ.

„ნაციონალურ მოძრაობაში“ კვლავ ფიქრობენ, რომ საქართველო კანდიდატის სტატუსს არ უნდა ელოდოს.

„ნაკლებია მოლოდინი, რომ კანდიდატის სტატუსს მიიღებს ქვეყანა. თუმცა ჩვენი სურვილია, რომ ყველაფერი გაკეთდეს იმისათვის, რომ კანდიდატის სტატუსი მიიღოს ქვეყანამ იმიტომ, რომ ეს ეხება არა ვიწროპარტიულ ინტერესებს, არამედ ქვეყნის ინტერესებს“, - განაცხადა „ნაციონალური მოძრაობის“ წევრმა ლევან ბეჟაშვილმა.