ლევან იოსელიანი: მთავარი, რისაც დასავლეთში ჩვენს პარტნიორებს არ ესმით, არის ის, თუ როგორ შეიძლება, რამე საკითხის გადაწყვეტა გინდოდეს და უარს ამბობდე ადამიანებთან სალაპარაკოდ დაჯდომაზე

გზავნილები, რომელიც ოლივერ ვარჰეისგან მივიღეთ, პირადად ჩემთვის იყო კიდევ ერთი დამადასტურებელი იმისა, რომ რამდენად უფრო სწორია, ჩვენ რასაც ვაკეთებთ პარლამენტში, სხვა მიდგომებისგან განსხვავებით. მთავარი, რისაც დასავლეთში ჩვენს პარტნიორებს არ ესმით, არის ის, თუ როგორ შეიძლება, რამე საკითხის გადაწყვეტა გინდოდეს და უარს ამბობდე ადამიანებთან სალაპარაკოდ დაჯდომაზე. ეს არის პოლიტიკის ელემენტარული ანაბანა, - ამის შესახებ გადაცემაში „იმედი LIVE“ პარლამენტის ვიცე-სპიკერმა, ლევან იოსელიანმა განაცხადა.

„ზოგადად, ევროპული პოლიტიკა აგებულია შეთანხმების გზით სიარულზე, და არა ერთმანეთის მიმართ ზურგით დგომაზე. ოპოზიციის როლი მდგომარეობს იმაში, რომ ყველაფერი გააკეთოს იმისთვის, რომ რისაც მას სჯერა, მაქსიმალურად მისაღები გახადოს მმართველი პარტიისთვის და ამისთვის იბრძოლოს ყველა ლეგიტიმური გზით, სადაც ეს შესაძლებელია. საქართველომ რომ მიიღოს კანდიდატის სტატუსი, ეს არის არა პარტიული, არამედ ქვეყნის ინტერესი, იქ რაიმე ტიპის პარტიული დღის წესრიგის შემოტანა ქვეყნის ინტერესების საზიანოდ გადადგმული ნაბიჯია. არავინ არ ჩამოდის აქ იმისთვის, რომ ვინმეს უთხრას - ან პარლამენტიდან გადი, ან რევოლუციაზე იმუშავე. ყველა ჩამოდის იმისთვის, რომ გვითხრას - ერთადერთი გზაა, რაღაც შეთანხმებას მივაღწიოთ. ჩვენ რომ ავირჩიოთ სახალხო დამცველი, რაღაც თვალსაზრისით მივაღწიოთ შეთანხმებას საარჩევნო რეფორმაზე და შემდეგი არჩევნები ჩავატაროთ ბევრად უკეთესი სტანდარტით, სასამართლოში მოვახდინოთ ცვლილებები, პარლამენტი გავხადოთ ბევრად უფრო ძლიერი და გავაძლიეროთ ზედამხედველობის კომპონენტი - ეს არის, რაც მათ აინტერესებთ. თუ ამ ყველაფერზე ამბობ, რომ ეს ჩვენთვის უინტერესოა, და მნიშვნელოვანია მხოლოდ ის, რომ მოვიდე ძალაუფლებაში, ასეთი რამის მე არ მესმის“, - აცხადებს იოსელიანი.