ეგილს ლევიტსი: ევროპაში გრძელვადიან მშვიდობაზე მხოლოდ მაშინ შევძლებთ საუბარს, როდესაც უკრაინა დაიბრუნებს ყველა სოფელს, ქალაქს, რეგიონს და ქვეყნის მთელი ტერიტორია რუსეთის ჯარისგან გათავისუფლდება

ევროპაში გრძელვადიან მშვიდობაზე მხოლოდ მაშინ შევძლებთ საუბარს, როდესაც უკრაინა დაიბრუნებს ყველა სოფელს, ქალაქს, რეგიონსა და უკრაინის მთელი ტერიტორია რუსეთის ჯარისგან გათავისუფლდება, - ამის შესახებ ლატვიის პრეზიდენტმა ეგილს ლევიტსიმ „იმედის კვირასთან“ ინტერვიუში განაცხადა.

მისივე თქმით, ლატვია ამ ბრძოლაში უკრაინის გვერდით იქნება.

„უკრაინისთვის დღეს უპირველესი სამხედრო მარაგების გადაცემაა. უკრაინამ მთელ მსოფლიოს გვაჩვენა, რომ თუ მიიღებს საჭირო და საკმარისს იარაღს,მაშინ შეძლებს რუსეთს უკან დაახევინოს. ეს ჩვენ ვნახეთ და უკრაინელი ჯარისკაცების პროფესიონალიზმზე ყველა ვსაუბრობთ. უკრაინას შეუძლია დაამარცხოს რუსეთი, თუ მიიღებს იარაღს. ევროპაში გრძელვადიან მშვიდობაზე მხოლოდ მაშინ შევძლებთ საუბარს, როდესაც უკრაინა დაიბრუნებს ყველა სოფელს, ქალაქს, რეგიონსა და უკრაინის მთელი ტერიტორია რუსეთის ჯარისგან გათავისუფლდება. უკვე 9 თვეა ომი მიმდინარეობს და არ ვიცით, როდემდე გაგრძელდება. უკრაინის გვერდით ვიქნებით ბოლომდე. თავდაცვის უნარიანობის გაზრდა, ინვესტიცია თავდაცვის სფეროში - ეს არის საუკეთესო გზა გრძელვადიან პერსპექტივაში ვიყოთ მზად საფრთხეებთან გასამკლავებლად“, - განაცხადა ლატვიის პრეზიდენტმა.

მან ასევე საუბრისას უკრაინისთვის სამხედრო დახმარების გაწევის აუცილებლობას გაუსვა ხაზი.

„აქვე ყველამ უნდა იცოდეს, რომ ევროკავშირისა და ნატოს წევრების სამხედრო შესაძლებლობები გაცილებით მაღალია და ძლიერია რუსეთთან შედარებით. ეს არის ის ერთადერთი ენა, რომელიც ესმის მოსკოვს. ეს არის ერთადერთი ენა, რომელიც ესმის პუტინს. თუ ვიქნებით ძლიერი, მაშინ გავუმკლავდებით საფრთხეებს, დავიცავთ ჩვენს სახელმწიფოებს და დავეხმარებით პარტნიორებს. იყო ძლიერი სამხედრო თვალსაზრისით, არის საფუძველი მშვიდობისა და სტაბილურობისთვის. რუსეთი არ მიიტანს იერიშს ქვეყანაზე, როდესაც ეცოდინება, რომ ბრძოლა მოსკოვის დამარცხებით დასრულდება. რუსეთს არ ეგონა, რომ ჩვენ ასე ერთიანი ვიქნებოდით. რუსეთს არ ეგონა, რომ ჩვენ 9 თვის განმავლობაში დახმარებას გავუწევდით უკრაინას. ეს რუსეთმა ვერ გათვალა. ჩვენ ვართ ერთიანი და ვართ ერთად, როდესაც საქმე ეხება სანქციებს. ეს უმნიშვნელოვანესია და ასე უნდა გაგრძელდეს“, აღნიშნა ლევიტსიმ.