გიული ალასანია: აუცილებელი არ არის ჯიშკარიანის დასკვნაში ასახული იყოს ამერიკელი ტოქსიკოლოგის მონაცემები

აუცილებელი არ არის ჯიშკარიანის დასკვნაში ასახული იყოს ამერიკელი ტოქსიკოლოგის მონაცემები, - ამის შესახებ მიხეილ სააკაშვილის დედამ, გიული ალასანიამ განაცხადა.

„რამდენადაც ვიცი ამერიკელ ექსპერტს გადმოგზავნილი აქვს დასკვნა, არ მეშლება მგონი. არ არის აუცილებელი, რომ ჯიშკარიანის დასკვნაშიც ასახულიყო ამერიკელი ტოქსიკოლოგის მონაცემები. იმას თავისი დასკვნა აქვს, რომელმაც უზარმაზარი სამუშაო ჩაატარა. აუცილებელი არ არის ერთ კოლექტივში იყოს გაერთიანებული. ეს ტოქსიკოლოგი ჩემი მოყვანილია და არ არის აუცილებელი, რომ ერთ კოლექტივში, ერთი ქოლგის ქვეშ იყოს“, - განაცხადა აღნიშნა გიული ალასანიამ.

გიული ალასანიამ ხელშეკრულება გააფორმა ამერიკულ კომპანიასთან, რომელიც პიარ-კამპანიას გაუწევს სააკაშვილის ქვეყნიდან გაყვანას. თუმცა გიული ალასანიამ უარყო, რომ ის ლობისტური კომპანიაა. მისი მტკიცებით, ეს არის იურიდიული კომპანია, რომელმაც ყოფილი პრეზიდენტის არგუმენტები უფრო დამაჯერებელი უნდა გახადოს.

ამასთან, გიული ალასანიას მიერ ამერიკული ლობისტური კომპანიის დაქირავების შემდეგ უცხოურ ონლაინ პლატფორმაზე პირველი შეკვეთილი სტატია გაჩნდა.

როგორც „ქრონიკამ“ გაარკვია, ცენტრ „ემპათიის“ ექსპერტიზის დასკვნაში ამერიკელი ტოქსიკოლოგის შეფასება არ დევს. არადა მიხეილ სააკაშვილის ჯანმრთელობის მდგომარეობის შესახებ „ემპათიის“ მიერ მომზადებულ დასკვნაში ნათქვამია, რომ ორგანიზმში აღმოჩენილია რამდენიმე ტოქსიკური ნივთიერება, რომლებიც ფსიქიკურ დარღვევებს იწვევს და აუცილებელია პაციენტის სამკურნალოდ გადაყვანა. ასევე, ნათქვამია, რომ ინტოქსიკაციის ალბათობის გათვალისწინებით მოსალოდნელია კომა და სიკვდილი.