გივი მიქანაძე რადიკალურ ოპოზიციაზე: ისეთ კრიზისში არიან, რომ უკვე აღარაფერს ერიდებიან და პირდაპირ დისკრედიტაციაზე გადმოდიან

ოპოზიციის იმ წარმომადგენლების გადასაწყვეტია, რომლებიც ამ პროცესში არ იყვნენ ჩართული, რომ ან მიდიან იმ ნაბიჯებისკენ, რომელიც ამ ქვეყნის წევრობის კანდიდატის სტატუსის მიღებას უწყობს ხელს და კონსტრუქციულად ერთვებიან პროცესში, ან ისინი საბოლოოდ ემიჯნებიან ქვეყნის ინტერესებს, საზოგადოებას, - ამის შესახებ საპარლამენტო უმრავლესობის წევრმა, გივი მიქანაძემ საარჩევნო რეფორმაზე საუბრისას განაცხადა.

მისი თქმით, რადიკალური ოპოზიცია ისეთ კრიზისშია, რომ უკვე აღარაფერს ერიდებიან.

„სამწუხარო ფაქტია, რომ ამის აღნიშვნა უწევთ ჩვენს დასავლელ პარტნიორებს ამ კონკრეტულ ანგარიშში, მაგრამ ეს არის რეალობა. ეს კიდევ ერთხელ ადასტურებს, თუ რამდენად მძიმე მდგომარეობაშია რადიკალური ოპოზიცია. ფაქტობრივად ისინი ისეთ კრიზისში არიან, რომ უკვე აღარაფერს ერიდებიან და პირდაპირ დისკრედიტაციაზე გადმოდიან“, - აღნიშნა გივი მიქანაძემ.

ვენეციის კომისია და ეუთო/ოდირი ოპოზიციის ნაწილს აკრიტიკებენ და სამწუხაროს უწოდებენ იმ ფაქტს, რომ ყველა პოლიტიკური პარტია კანონმდებლობის შემუშავების პროცესში ჩართული არ არის. საერთაშორისო ექსპერტები ბოიკოტის გამოცხადებას არ ეთანხმებიან და ამბობენ, რომ ბოიკოტი არ უნდა წარმოადგენდეს პოლიტიკური ვაჭრობის ინსტრუმენტს. წინასწარი შეფასების შემდეგ, პარლამენტში, საარჩევნო რეფორმის მეორე მოსმენით განხილვა იწყება, ხვალ სამუშაო ჯგუფის სხდომა გაიმართება და დოკუმენტში ის რეკომენდაციები აისახება, რომლებიც პარლამენტს ვენეციის კომისიამ და ეუთო/ოდირმა გადაუგზავნა. იურიდიულ კომიტეტზე კი კანონპროექტებს მუხლობრივად 8 დეკემბერს განიხილავენ. რეფორმამ მთლიანობაში საერთაშორისო ექსპერტებისგან დადებითი შეფასება მიიღო.