რუსეთი და საქართველო ობამას გადაწყვეტილებებს ეხმაურებიან

20 დეკემბერს, აშშ-ის ფინანსთა სამინისტრომ ყირიმის ანექსიისა და უკრაინაში შეიარაღებული კონფლიქტის გამო რუსეთის წინააღმდეგ დაწესებული სანქციები გააფართოვა. სამ დღეში, ამერიკის ვაჭრობის სამინისტრომ სია გაზარდა და მასში დამატებით 23 რუსული ორგანიზაცია შეიყვანა. 

24 დეკემბერს ამერიკის პრეზიდენტმა პენტაგონს რუსეთთან სამხედრო თანამშრომლობა შეუზღუდა, ხელი მოაწერა რა ქვეყნის 2017 წლის სამხედრო ბიუჯეტს, რომლის თანახმად თანამშრომლობა მანამდე არ განახლდება, სანამ კონგრესი არ დარწმუნდება, რომ რუსეთი უკრაინის სუვერენიტეტსა და ტერიტორიულ მთლიანობას საფრთხეს არ უქმნის.

ამერიკის მთავრობის მიერ სანქციების გაფართოებას მოსკოვის საგარეო უწყება დღეს გამოეხმაურა და განცხადებაში წერს, რომ ანტირუსული სანქციების მუდმივი გაფართოებით ობამას ადმინისტრაცია საკუთარ ქვეყანას აზიანებს. "ჩვენ სანქციებით ვერავინ შეგვაშინებს. რუსული კომპანიები (...) და სხვა სტრუქტურები, რომელთა წინააღმდეგაც ამხედრდა ამერიკის მიმავალი ადმინისტრაცია, განაგრძობენ ნორმალურად მუშაობას", ვკითხულობთ რუსეთის საგარეო საქმეთა სამინისტროს განცხადებაში. 

ამ ფონზე, ამერიკის პრეზიდენტის მიერ ხელმოწერილი სამხედრო ბიუჯეტის კანონი ითვალისწინებს შტატების მოკავშირეებისა და პარტნიორებისთვის 4 მილიარდ დოლარზე მეტი სამხედრო დახმარების გამოყოფას.

დოკუმენტში ნახსენებია საქართველოც და ამერიკის ერთგულება მისი სუვერენიტეტის მიმართ. დოკუმენტის ქართული ფრაგმენტი, საქართველოს საგარეო საქმეთა სამინისტროდან მინისტრის მოადგილემ, დავით ზალკალიანმა შეაფასა. "ინტერპრესნიუსთან" კომენტარში ის აცხადებს: "კანონის მუხლები საქართველოს აძლევს შესაძლებლობას, რომ ევროპის სხვა პარტნიორ სახელმწიფოებთან ერთად, განახორციელოს ერთობლივი სამხედრო წვრთნები აშშ-სთან და ასევე სხვა ტიპის სამხედრო თანამშრომლობით აიმაღლოს თვდაცვისუნარიანობა, გავზარდოთ ნატო-სთან ურთიერთთავსებადობა და უკეთ გავუმკლავდეთ არსებულ და შესაძლო საფრთხეებსა და გამოწვევებს. ჩვენ 2017 წელსაც გავაგრძელებთ აშშ-სთან აქტიურ მუშაობას თავდაცვის, უსაფრთხოების, ეკონომიკის, დემოკრატიული მმართველობის სფეროში კონკრეტულ სამოქმედო გეგმებზე, რათა საქართველოს საჭიროებები სათანადოდ იყოს გათვალისწინებული და ორ ქვეყნას შორის თანამშრომლობა კიდევ უფრო გაღარმავდეს. რა თქმა უნდა, ვაფასებთ აშშ-ს ურყევ მხარდაჭერას საქართველოს სუვერენიტეტისა და ტერიტორიული მთლიანობის მიმართ"

დოკუმენტს ძალიან მნიშვნელოვანი უწოდა საქართველოს საგარეო საქმეთა მინისტრმაც.