ლევან მამალაძე: გარკვეული ძალები ცდილობენ, საქართველო საომარ პროცესში შეიყვანონ. ეს სცენარი დიდი ხანია დაიწერა, მაგრამ ვერ შეძლეს ქართული საზოგადოების მოტყუება

საქართველოს მოქალაქეებს პასუხი არ მიუღიათ, რატომ დავმარცხდით 5 დღის განმავლობაში, რომ ვერანაირი წინააღმდეგობა ვერ გავუწიეთ [რუსეთს], რატომ გახდა ცხინვალის მოსახლეობა დევნილი, რატომ გადაეცა კოდორი, რატომ მოხდა ფოთში ჩვენი ტექნიკის გადაცემა?, - ამის შესახებ სტრატეგიული დაგეგმარების ცენტრის ხელმძღვანელმა ლევან მამალაძემ გადაცემაში „იმედი LIVE“ განაცხადა.

მისი თქმით, წინა ხელისუფლება რუსეთთან გარიგებაში იყო შესული.

„ჩვენ ძირშივე უნდა ჩავწვდეთ იმ დანაშაულებრივ გარიგებას, რამაც ეს შედეგი მოგვიტანა. შედეგად მივიღეთ ძალიან ცუდი რამ - რუსეთს მიეცა საფუძველი, ეღიარებინა ტერიტორიები, რომელსაც მან ოკუპირება გაუკეთა, მიეცა საშუალება ხელში ჩაეგდო ნატოს უახლესი შეიარაღება. ძიების ეს პროცესი უნდა დაიწყოს 2007 წლიდან, როცა მიხეილ სააკაშვილმა მოშალა მშვიდობიანი პროცესი კოდორის ხეობაში, ემზარ კვიციანი დევნილად აქციეს, ცხონებული ნორა კვიციანი კი პირად პატიმრად ჰყავდა. იმ დღიდან უნდა დაიწყოს გამოძიება. საქართველოს მოქალაქეებს პასუხი არ მიუღიათ, რატომ დავმარცხდით და 5 დღის განმავლობაში, რომ ვერანაირი წინააღმდეგობა ვერ გავუწიეთ, რატომ გახდა ცხინვალის მოსახლეობა დევნილი, რატომ გადაეცა კოდორი, რატომ მოხდა ფოთში ჩვენი ტექნიკის გადაცემა? - ამაზე პასუხი არავის უგია, ერთადერთი რაც ჩვენ მივიღეთ გავიმარჯვეთო და დავლურის და კინტოურის ცეკვა მივიღეთ თბილისში, არადა ადამიანები გაუბედურდნენ და ამას შეეწირნენ. დღეს ჩვენ მშვიდობისთვის გვიწევს ბრძოლა, რადგან შექმნილი ვითარება გვიბიძგებს იქითკენ, რომ გარკვეული ძალები ცდილობენ საქართველო შეიყვანონ საომარ პროცესში. ეს სცენარი კარგა ხანია დაიწერა, მაგრამ ვერ შეძლეს ქართული საზოგადოების მოტყუება“, - აღნიშნა მამალაძემ.

მან ისაუბრა მიხეილ სააკაშვილზე და მის გარშემო განვითარებულ პროცესებზეც.

„სანატორიუმშია. მე პრეცედენტს ვერ დაგისახელებთ ვერცერთი ქვეყნისა, რომ ნებისმიერი ლიდერი, რომელიც შეიძლება ციხეშია ნამყოფი, ვინმე ასეთ პირობებში ყოფილიყო. როცა ვხედავთ, რომ აცხადებენ, რომ სააკაშვილი მოიწამლა, რომ საზღვარგარეთ უნდა ვუმკურნალოთ და ა.შ., ძიება დროზე უნდა დაიწყოს, დაიკითხოს საქართველოს მიმართ მიყენებული ზარალისთვის, ტერიტორიის გადაცემისთვის, დაიკითხოს იმისთვის, თუ რატომ მოხდა რუსეთთან გარიგებაში შესვლა და ჩვენი მარცხი რამ გამოიწვია, ასევე, ამ ომის მარცხის შემდეგ ოკუპანტის კომერციულ სტრუქტურებს რატომ გადასცეს საქართველოს სტრატეგიული ობიექტები და სად წავიდა ის 5 მილიარდზე მეტი თანხა, რომელიც დევნილ მოსახლეობას უნდა მოხმარებოდა“, - განაცხადა ლევან მამალაძემ.