დიმიტრი ხუნდაძე: უსამართლობაა, როდესაც ქართულ საზოგადოებას, რომელსაც კარგი მეხსიერება აქვს ეუბნებიან, რომ სააკაშვილი არის თურმე დემოკრატიის შუქურა, ივანიშვილი კი - დემოკრატიის უკუსვლის ფუძემდებელი

ევროპარლამენტი არ არის ისეთი ორგანო, რომელიც ზედაპირული უნდა იყოს და მუშაობდეს შანტაჟის მექანიზმებზე,- ამის შესახებ მოძრაობა „ხალხის ძალის“ ერთ-ერთმა ლიდერმა დიმიტრი ხუნდაძემ „ქრონიკასთან“ განაცხადა.

„გარდა იმისა, რომ ეს ევრორეზოლუციები შანტაჟის მექანიზმია, ასევე არის შეურაცხმყოფელი ქართული სახელმწიფოსა და საზოგადოებისთვის. ის არავითარ ფაქტს არ ეფუძნება და არის მშრალად, ზედაპირულად გამოტანილი. ზედაპირულობა სწორედაც რომ აზიარებს თავად ევროპარლამენტს. ის არ არის ისეთი ორგანო, რომელიც ზედაპირული უნდა იყოს და მუშაობდეს შანტაჟის მექანიზმებზე. როდესაც პირველი შანტაჟი არ ჭრის, შემოიტანეს მეორე. არც პირველი მივიდა ბოლომდე და არც მეორე, იმიტომ რომ ეს უნდა იყო შანტაჟის მექანიზმად გამოყენებული და არა მათთვის ეს სასურველი შედეგი, რომ რეალურად მოხდეს ივანიშვილის სანქცირება. თუკი გავყვებით ლოგიკას, თუ სანქცირება მოხდება, მაშინ ის შანტაჟად ვეღარ გამოდგება და მათი იმედი, რომ ბიძინა ივანიშვილი გამოყენებული იქნება პოლიტიკაში ჩართვით მმართველი გუნდის ზეწოლისთვის, რომ მან მიიღოს იმდაგვარი გადაწყვეტილება, რაც გარე დაკვეთებს წაადგება, იგივე სანქცირების ან ომში ჩართვის საკითხში, [აღარ იქნება]“, - განაცხადა ხუნდაძემ.

მისივე თქმით, უსამართლოა განცხადებები, რომ „სააკაშვილი დემოკრატიის შუქუაა, ივანიშვილი კი დემოკრატიის უკუსვლის ფუძემდებელი“.

„მოწოდებებიც გახსოვთ ალბათ - „ქართული ოცნების“ ხელისუფლება არ არის ის ხელისუფლება, რომელიც საომარ მოქმედებებში ჩაერთვება. მიხეილ სააკაშვილი არის სწორედ ასეთი ხელისუფალი. უსამართლოა, როდესაც ქართულ საზოგადოებას, რომელსაც კარგი მეხსიერება აქვს და კარგი პოლიტიკური შემფასებელია, რაც 2012-ში აჩვენა, ახლა ჩვენ ვეუბნებით, რომ მიხეილ სააკაშვილი არის თურმე დემოკრატიის შუქურა და ბატონი ბიძინა ივანიშვილი არის ფუძემდებელი დემოკრატიის უკუსვლისა. ის არის დემოკრატიის უკუსვლა, როდესაც სააკაშვილის დროს საპყრობილეში აბსოლუტურად ადამიანისთვის მიუღებელი პირობები იყო და სწორედ ამიტომ, ყოველ ხუთ დღეში იქიდან 3 გვამი გამოდიოდა. დღეს მიხეილ სააკაშვილ ბედი აქვს, რომ ის საკუთარ საპყრობილეში არ მოხვდა. ვფიქრობ, გარკვეულ ორმაგ სტანდარტს ჩვენც ვუწყობთ ხელს, იმიტომ რომ კი გვეუბნებიან სააკაშვილი გაათავისუფლეთო, მაგრამ საიდან უნდა გათავისუფლდეს, როდესაც საპყრობილეში კი არა ოროთახიან პალატაშია, სადაც 24 საათი ემსახურებიან ექიმები და ამ დროს სასჯელაღსრულების სისტემაში არიან ისეთი ავადმყოფები, რომლებსაც კიდევ უფრო მეტი ყურადღება სჭირდებათ. მიხეილ სააკაშვილი კი უპირატესობაშია. პრეზიდენტობა არ არის პრივილეგია, ეს არის პასუხისმგებლობა. ჩვენც უნდა დავიცვათ ის წესები, რომ სასჯელაღსრულების სისტემაში ასეთი მასშტაბის კრიმინალს არ ჰქონდეს პრივილეგია რომ 24-საათიანი სამედიცინო მეთვალყურეობის ქვეშ იყოს, როცა მას ამდაგვარი არ სჭირდება“, - განაცხადა ხუნდაძემ.