ლევან იოსელიანი: მნიშვნელოვანია, ყველა ოპოზიციური პარტია იყოს ჩართული რეკომენდაციების შესრულებაში. თუ ვინმეს საკუთარი პარტიული ინტერესები უფრო მნიშვნელოვნად მიაჩნია, ვიდრე საქართველოს ევროპული მომავალი, ეს მათ პოლიტიკურ სინდისზე იყოს

ჩვენ გვაქვს კიდევ მთელი საგაზაფხულო სესია იმისთვის რომ სამუშაო ჯგუფებმა დაასრულონ მუშაობა და იმ პუნქტებზე, სადაც წინსვლა ვერ გვაქვს, მივაღწიოთ შეთანხმებას. მაგრამ აქ მნიშვნელოვანია, რომ ყველა ოპოზიციური პარტია იყოს ჩართული ამ საკითხში, - ამის შესახებ ლევან იოსელიანმა ევროკავშირის რეკომენდაციების შესრულებაზე საუბრისას განაცხადა. პარლამენტის ვიცე-სპიკერი მიიჩნევს, რომ პირველ რიგში 12 რეკომენდაციების შესრულებაზე პასუხისმგებელი მმართველი გუნდია, თუმცა ხაზს პროცესში ყველა ოპოზიციური პარტიის მონაწილეობის მნიშვნელობას უსვამს.

„მათ უნდა შეცვალონ თავიანთი პოზიცია, ყველაფერში მიიღონ მონაწილეობა, როგორც ამას რამდენიმე პარტია ვაკეთებთ და საჯაროდ ილაპარაკონ იმ პრობლემებზე, რაც „ქართულ ოცნებასთან“ მიმართებაში არის და იმ მიღწევებზე რაც გვაქვს, იმიტომ რომ საბოლოო ჯამში ერთიანი პოზიცია გქონდეს, როდესაც ჩვენი საკითხის განხილვა იქნება ევროპული საბჭოს კომისიის მიერ. ეს არის ძალიან მნიშვნელოვანი. თუ ვინმეს ამის გააზრება არ უნდა და საკუთარი პარტიული ინტერესები უფრო მნიშვნელოვნად მიაჩნია, ვიდრე საქართველოს ევროპული მომავალი, ევროკავშირის სივრცესთან დაახლოება და საუკუნეების განმავლობაში ჩვენი წინაპრების ოცნება, რომ ეს ქვეყანა ევროპის ნაწილი გამხდარიყო, ეს მათ პოლიტიკურ სინდისზე იყოს. იმედი მაქვს, ამომრჩეველი მომავალში ამ ყველაფერს საკადრის პასუხს გასცემს“, - აცხადებს იოსელიანი.