დავით მათიკაშვილი „ნაცმოძრაობაზე“: მათ დატოვეს ხელისუფლება, ჩვენი ქვეყნისთვის უკეთესი იქნება, თუ ისინი ოპოზიციასაც დატოვებენ და ამ პოლიტიკურ სპექტრს დაუთმობენ ჯანსაღ ძალებს

საქმე ძალიან მარტივადაა - მიდის თავაწყვეტილი, ყოველგვარ მორალს გადაცილებული წითელხაზებდარღვეული ბრძოლა პარტიის შიგნით მმართველობის ხელში ჩასაგდებად და ამისთვის ისინი არაფერს ერიდებიან. სინამდვილე არის ერთი - ერთმანეთში ვერ გაიყვეს ხელისუფლება, ვერ ჩამოყალიბდნენ იმაზე, ვინ არის რეალური პირველი პირი ამ რადიკალურ დაჯგუფებაში, - ამის შესახებ საპარლამენტო უმრავლესობის წევრმა დავით მათიკაშვილა „ქრონიკასთან“ „ნაციონალურ მოძრაობაში“ მიმდინარე პროცესების შეფასებისას განაცხადა.

მისი თქმით, ქვეყნისთვის კარგი იქნება, თუ „ნაციონალური მოძრაობა“ სხვა ჯანსაღ ძალებს დაუთმობს პოლიტიკურ სივრცეს.

„მიხეილ სააკაშვილს არაფრად აგდებენ. ცხადია, მიხეილ სააკაშვილის ფაქტორი არსებობს, ბელადომანიის სენით შეპყრობილი ადამიანების ჯგუფი ამ მძიმე სენიდან ვერ გამოდის, მაგრამ თვითონ სააკაშვილის ხვედრითი წილი რამდენია ამ მოცემულობაში, ეს არის მთავარი. სინამდვილე არის შემდეგში - პროცესი, რომელიც მიმდინარეობს „ნაცმოძრაობაში“, არის იმ მცირე ნაბიჯების ერთობლიობის შემადგენელი ნაწილი, რომელიც საბოლოო ჯამში ამ პარტიას დაშლამდე მიიყვანს. მათ უნდოდათ, რომ ეს ქაოსი, არეულობა, რაც დღეს „ნაცმოძრაობაშია“, დატრიალებულიყო საქართველოში და ბუმერანგივით მიიღეს საკუთარ თავზე. ახლა უკვე შიგნით იმაზე საუბარი, რომელი უფრო მეტ ძალას ფლობს, იმისთვის რომ ერთმანეთს ხელი გადაუგრიხონ, ბინძური კომპრომატებით ერთმანეთის დისკრედიტაცია მოახდინონ, კიდევ უფრო მეტად ავლენს ამ ამორალური პოლიტიკური ძალის ჭეშმარიტ სახეს და კიდევ ერთხელ არწმუნებს საზოგადოებას იმაში, რომ ამ ადამიანების ხელისუფლებასთან ახლოს ყოფნაც კი ძალიან საშიშია ქვეყნის უსაფრთხოებისთვის და იმ მშვიდობისთვის, რომელიც საქართველოში არსებობს. მათ დატოვეს ხელისუფლება და ჩვენი ქვეყნისთვის უკეთესი იქნება, თუ ისინი ოპოზიციასაც დატოვებენ და ამ პოლიტიკურ სპექტრს დაუთმობენ ჯანსაღ ძალებს“, - განაცხადა მათიკაშვილმა.