დევიდ ჰოფმანი: ნამდვილად ვერ ვისაუბრებ იმ ორგანიზაციების სახელით, რომელთა თანამშრომლებმაც გარკვეული განცხადება გააკეთეს

„იმედის კვირა“ USAID-ის ოფისის დირექტორის მოადგილე დევიდ ჰოფმანს შეხვდა და მათ მიერ დაფინანსებული პროექტების და არასამთავრობოების ობიექტურობასთან დაკავშირებით არსებული კითხვები დაუსვა.

„ჩვენი პროგრამები ძირითადად ორიენტირებულია ტექნიკურ საკითხებზე. ვთანამშრომლობთ აკადემიურ წრესთან, მოსამართლეებთან, ექსპერტებთან. ნამდვილად ვერ ვისაუბრებ იმ ორგანიზაციების სახელით, რომელთა თანამშრომლებმაც გარკვეული განცხადება გააკეთეს. ასევე, გამიჭირდება იმ ადამიანები სახელით საუბარი, ვინც უშუალოდ ჩვენთან არ მუშაობს. შემიძლია ვისაუბრო მათი სახელით, ვისაც ვიცნობ და ვისთანაც ვმუშაობ USAID-ში.

USAID-ი და ამერიკის მთავრობა თითქმის 20 წელია ვთანამშრომლობთ სასამართლოს წარმომადგენლებთან. საკმაოდ მჭიდრო პარტნიორობა გვაქვს მათთან და ამით ძალიან ვამაყობთ. USAID-ი გამჭვირვალედ მუშაობს. 3 თვეში ერთხელ ანგარიშებს ვაწვდით ჩვენს პარტნიორებს, რათა ყოველგვარი სიურპრიზი გამოირიცხოს.

​რაც შეეხება თქვენს კითხვას იმ წინადადებასთან დაკავშირებით, რომელიც პარტნიორების ვებგვერდზე იხილეთ, ეს მოსაზრება CRRC-ისა და IRI-ს კვლევებს ეფუძნება. სამწუხაროდ, მე არ ვარ კანონის უზენაესობის სფეროში მომუშავე, იურისტიც კი არ ვარ. შესაბამისად, პირადად ჩემს მოსაზრებას ვერ გაგიზიარებთ, თუ რამდენად პოზიტიურად შეიცვალა სასამართლო სისტემა საქართველოში ხელისუფლების ცვლილების შემდეგ. გეტყვით, რომ ყოველთვის არის რაღაც, რაც შეიძლება გაუმჯობესდეს და ასევე არის წარმატებებიც, რომლებსაც ერთად ვზეიმობთ. რაც შეეხება გასაუმჯობესებელ სივრცეს, ეს არ ეხება მხოლოდ საქართველოს სასამართლოს. საუბარია ამერიკის სასამართლო სისტემაზეც. ჩვენთანაც არის ასეთი საკითხები. აქ ერთი მთავარი, რომ მოსამართლეთა საქმიანობა უნდა იყოს დამოუკიდებელი და გამჭვირვალე“, - ამბობს ჰოფმანი.

სასამართლო სისტემის მდგომარეობის შესახებ ცნობიერების ამაღლების ინიციატივების მხარდასაჭერად საგრანტო კონკურსის ფარგლებში რომელიც სწორედ USAD-ის დაფინანსებით მიმდინარეობს, ვკითხულობთ რომ მოსახლეობა სასამართლოში არსებულ ვითარებას პირველი რიგის პრობლემად არ აღიქვამს, რადგან საზოგადოება სათანადოდ ინფორმირებულია არ არის. ამიტომ პროექტის მიზანი მოქალაქეთა ცნობიერების ამაღლებაა. ყველაზე საინტერესო ჩანაწერი კი პრობლემის განმარტების გრაფაში არსებული პირველი წინადადებაა, თითქოს „მოსახლეობის ნდობა სასამართლო სისტემის მიმართ დაბალია“. ამ ინფორმაციას საფუძვლად ამერიკის ეროვნულ დემოკრატიული ინსტიტუტის მიერ გამოქვეყნებული, ასევე CRRC-ს მიერ ჩატარებული კვლევები დაედო.