შალვა პაპუაშვილი: ოპოზიციის ნაწილი არც აქამდე გამოირჩეოდა აქტიური საპარლამენტო საქმიანობით, პარლამენტი მათი აქტიურობის გარეშეც ქმედუნარიანია

მათ [რადიკალური ოპოზიცია] თითქმის ერთი წელი, სულ მცირე ნახევარი წელი დაკარგეს დასაწყისში, როდესაც ბოიკოტში იმყოფებოდნენ და არ გამოირჩეოდნენ აქტიურობით. სხვათა შორის, ალბათ საზოგადოებას ახსოვს, შარშან, წლის ბოლოს საჯაროდაც გავახმოვანეთ, რომ არასაპატიო მიზეზით გაცდენების გამო, 70 000 ლარის ხელფასი დაექვითა ოპოზიციის წარმომადგენლებს, რაც შემდეგ პარლამენტის მხრიდან ქველმოქმედებაში დაიხარჯა. ესეც გვაჩვენებს, როგორ არის რიცხვში ასახული ოპოზიციის პასიურობა, - ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

მისივე თქმით, საპარლამენტო უმრავლესობას შეუძლია, მიიღოს კანონები, რომლებიც უზრუნველყოფს მოსახლეობის კეთილდღეობის ზრდას და ამ მხრივ შეფერხება არ არის.

„რაც შეეხება მომავალს, საპარლამენტო უმრავლესობას აქვს საპარლამენტო უმრავლესობა, რაც გულისხმობს, რომ ჩვენ შეგვიძლია, მივიღოთ კანონები, რომლებიც უზრუნველყოფს ჩვენი მოსახლეობის კეთილდღეობის ზრდას. ამიტომ ამ მხრივ შეფერხება არ გვაქვს. ჩვენ ერთი მხრივ, გამომდინარე იქიდან, რომ პარლამენტი არის ერთ-ერთი ის ინსტიტუტი, რომელიც ყველაზე გამჭვირვალედ მოქმედებს და ჩართულობის მაღალი ხარისხია, ყველას აქვს შესაძლებლობა, იყოს მონაწილე ამ პროცესებისა, ამავე დროს, თვითკრიტიკულებიც ვართ ბევრ საკითხში, ჩვენ უზრუნველვყოფთ, რომ ნებისმიერ საკითხთან დაკავშირებით ღია დისკუსიის შედეგად მივიღოთ რაციონალური გადაწყვეტილებები.

ამიტომ, რა თქმა უნდა, ოპოზიცია აქ იქნებოდა დიდი დამხმარე, რომ იყოს აქტიური, მაგრამ მათი აქტიურობის გარეშეც, პარლამენტი არის ქმედუნარიანი. ვიტყოდი, რომ ახლა მნიშვნელოვანი არის განსაკუთრებით შემდეგი წელიწადნახევარი სწორედ ოპოზიციისთვის და განსაკუთრებით იმ ნაწილისთვის, რომელსაც ერთი მხრივ, არ უნდა, იყოს რადიკალური დღის წესრიგის ნაწილი, თუმცა იძულებულია, გარკვეულწილად აყვეს ხოლმე „ნაციონალურ მოძრაობას“, ვინაიდან არიან ჯერ კიდევ პატარები და სუსტები. ისინი კი, სამწუხროდ, ნაცვლად იმისა, რომ ამ პერიოდს იყენებდნენ, რათა აჩვენონ თავის ამომრჩეველს, რატომ უნდა მისცენ მათ ხმა მომავალ არჩევნებზე და ამით გაძლიერდნენ, დაარწმუნონ უფრო მეტი მოქალაქე, რომ ხმა მისცენ, ისინი მაინც ხანდახან და რიგ შემთხვევაში ყვებიან ამ დღის წესრიგს“, - განაცხადა შალვა პაპუაშვილმა საქართველოს პირველი არხის ეთერში.