ხათუნა ბურკაძე: პენტაგონის მიერ საქართველოს უსაფრთხოებისათვის 33 მილიონი დოლარის გამოყოფის ინიცირება კვლავ ცხადყოფს, რომ აშშ საქართველოს სტრატეგიული მოკავშირეა

ამერიკის შეერთებული შტატების თავდაცვის დეპარტამენტის მიერ საქართველოს უსაფრთხოებისათვის 33 მილიონი დოლარის გამოყოფის ინიცირება კვლავ ცხადყოფს, რომ აშშ თავდაცვისა და უსაფრთხოების სფეროში საქართველოს არა მხოლოდ პარტნიორი, არამედ სტრატეგიული მოკავშირეა. ამერიკის შეერთებული შტატების თავდაცვის მდივნის ლოიდ ოსტინის განცხადება კიდევ ერთი დასტურია იმისა, რომ ამერიკის შეერთებული შტატებისათვის მნიშვნელოვანია, დაეხმაროს საქართველოს თავდაცვითი შესაძლებლობების განვითარებაში, განსაკუთრებით რუსეთის ფედერაციიდან მომდინარე მზარდი აგრესიის ფონზე. აშშ-ს თავდაცვის მდივანმა ურყევი მხარდაჭერა გამოხატა საქართველოს სუვერენიტეტისა და ტერიტორიული მთლიანობის ხელშეუხებლობისადმი. ასევე, მან საქართველოს მიერ გლობალური უსაფრთხოების უზრუნველყოფის პროცესში შეტანილ წვლილზე განსაკუთრებული ყურადღება გაამახვილა, - ამის შესახებ ანალიტიკური ცენტრის „ჯეოქეისის“ საგარეო პოლიტიკის მიმართულების ხელმძღვანელმა, პროფესორმა ხათუნა ბურკაძემ საქართველოს თავდაცვის მინისტრის ამერიკის შეერთებულ შტატებში ვიზიტის შეფასებისას განაცხადა.

„ამერიკის შეერთებული შტატების მიერ მიღებული გადაწყვეტილება საქართველოსათვის სამხედრო დახმარების გაზრდის შესახებ ხელს შეუწყობს საქართველოს თავდაცვისა და შეკავების გაძლიერების ინიციატივის განხორციელებას, რომლის მიზანია საქართველოს თავდაცვისუნარიანობის განმტკიცება, თავდაცვის ძალების ჩრდილოატლანტიკური ალიანსის სტანდარტებთან კიდევ მეტად დაახლოება და შეკავების პოლიტიკის ეფექტიანად განხორციელება, რაც გულისხმობს საფრთხეების თავიდან აცილების შესაძლებლობების განვითარებას.

საქართველოსთან დაკავშირებით რისკის მიხედვით შეფასებული გადახდის გრაფიკის დამტკიცებით კი ქვეყანა შეძლებს სასიცოცხლო მნიშვნელობის სამხედრო შესაძლებლობები უფრო მარტივად მოითხოვოს და შეიძინოს. რეგიონში არსებული ურთულესი გამოწვევების ფონზე, აღნიშნული გადაწყვეტილება საქართველოს უსაფრთხოების უზრუნველყოფის პროცესში მნიშვნელოვან როლს შეასრულებს“, - დასძინა ბურკაძემ.

აშშ-ის თავდაცვის მდივანი, ლოიდ ოსტინი საქართველოს თავდაცვის მინისტრ ჯუანშერ ბურჭულაძეს შეხვდა. ოფიციალური დახვედრის ცერემონია პენტაგონში გაიმართა. ლოიდ ოსტინის განცხადებით, საქართველომ გააღრმავა კავშირები დასავლეთთან და განამტკიცა თავისი გზა ევროატლანტიკური ინტეგრაციისკენ.