ანრი ოხანაშვილი: სიმბოლურია, რომ ევროპის ფარგლებში არსებულმა უმაღლესი დონის ინსტიტუციამ, სტრასბურგის სასამართლომ ამხილა პოლიტიკური სტრუქტურის მიერ მიღებული დეზინფორმაციული დოკუმენტი, რომელსაც ე.წ. რეზოლუცია ჰქვია

საპატიმრო დაწესებულებაში პირის მოხვედრა ნიშნავდა იმას, რომ ის, მაშინდელი ხელისუფლების პირობებში, ადამიანად აღარ აღიქმებოდა. რა პირობებში უწევდათ ყოფნა და როგორ წამებას ახორციელებდნენ, ეს დაადასტურა სტრასბურგის სასამართლომ, - ამის შესახებ საპარლამენტო უმრავლესობის წევრმა, ანრი ოხანაშვილმა „ქრონიკაში“ ჩართვისას განაცხადა.

მან სააკაშვილთან დაკავშირებით მიღებულ ევროპარლამენტის რეზოლუციას დეზინფორმაციული უწოდა. იგი ასევე სტრასბურგის სასამართლო გადაწყვეტილებას გამოეხმაურა. ოხანაშვილის თქმით, სტრასბურგის სასამართლომ თავის გადაწყვეტილებაში ორ მნიშვნელოვან კომპონენტზე გაამახვილა ყურადღება.

„ეს არის ძალიან მძიმე რამ, როდესაც სტრასბურგი ეუბნება ქვეყანას და ამ შემთხვევაში ევროპარლამენტს თავის რეზოლუციასთან მიმართებაში, რომ ადამიანი, ვისი წარმოჩენაც ხდება, თითქოს, იყო დემოკრატი და დასავლური ღირებულებების ერთგული, მისი ხელისუფლების პირობებში, ეს ხალხი პატიმრებს აწამებდნენ არა მხოლოდ სისტემატურად, არამედ სისტემურად. მთელი სახელისუფლებო რგოლი იყო ამაში ჩართული. როგორც სტრასბურგის სასამართლო ამბობს, ეს კეთდებოდა იმისთვის, რომ პატიმრებში შიში დაეთესათ და პატიმრები სრულ მორჩილებაში ყოფილიყვნენ.

ჩვენ ხომ ყველამ კარგად ვიცით, რომ რეალურად, საპატიმრო დაწესებულებაში პირის მოხვედრა ნიშნავდა, რომ ის, მაშინდელი ხელისუფლების პირობებში, ადამიანად აღარ აღიქმებოდა. რა პირობებში უწევდათ ყოფნა და როგორ წამებას ახორციელებდნენ, ეს დაადასტურა სტრასბურგის სასამართლომ. კიდევ ერთხელ, სიმბოლურია, რომ ევროპის ფარგლებში არსებულმა უმაღლესი დონის ინსტიტუციამ, სტრასბურგის სასამართლომ ამხილა პოლიტიკური სტრუქტურის მიერ მიღებული დეზინფორმაციული დოკუმენტი, რომელსაც ჰქვია ე.წ. რეზოლუცია“, - განაცხადა ოხნაშვილმა.

იუსტიციის სამინისტროს განმარტებით, 2023 წლის 16 თებერვალს ადამიანის უფლებათა ევროპულმა სასამართლომ გამოაქვეყნა გადაწყვეტილება საქმეზე „ოჩიგავა საქართველოს წინააღმდეგ“, რითაც კიდევ ერთხელ დადასტურდა, რომ 2012 წლამდე საქართველოს პენიტენციურ დაწესებულებებში პატიმართა წამება და არასათანადო მოპყრობა „იყო სისტემატური ხასიათის და მთელი სისტემისთვის დამახასიათებელი“ პრობლემა.

ამასთან, ახლახან ევროპარლამენტმა მიხეილ სააკაშვილთან დაკავშირებით რეზოლუცია მიიღო, რომელსაც მხარი 577 დეპუტატმა დაუჭირა, 33 მოწინააღმდეგე იყო, ხოლო 26-მა კი თავი შეიკავა.