შალვა პაპუაშვილი: მნიშვნელოვანია, უკრაინას საქართველოში წარმოადგენდეს ნამდვილი ელჩი და არა საელჩოს თანამშრომელი - იმედი მაქვს, საგარეო საქმეთა სამინისტრო კასიანოვს გაესაუბრება

უკრაინას საქართველოში უნდა წარმოადგენდეს ნამდვილი ელჩი და არა საელჩოს თანამშრომელი, იმედი მაქვს, საგარეო საქმეთა სამინისტრო კასიანოვს გაესაუბრება, – ამის შესახებ საქართველოს პარლამენტის თავმჯდომარემ, შალვა პაპუაშვილმა კასიანოვის განცხადების შეფასებისას აღნიშნა.

მისივე თქმით, ქვეყნის შიგნით ოპოზიციის ნაწილი და უკრაინაში გარკვეული ჯგუფები ცდილობენ, რომ უკრაინა და საქართველო ერთმანეთს გადაკიდონ.

„მე გუშინ მქონდა კომუნიკაცია ჩემს კოლეგასთან, უკრაინის რადას ხელმძღვანელთან, მივიღე მადლობა მისი მხრიდან ჩვენი მხარდაჭერისთვის. ეს არის, რასაც მე ვაფასებ. უკრაინის საელჩოს ცალკეული წარმომადგენლის განცხადებებზე კომენტარს ვერ გავაკეთებ. იმედი მაქვს, საგარეო საქმეთა სამინისტრო ამ საკითხთან დაკავშირებით გაესაუბრება მას. მნიშვნელოვანია, განსაკუთრებით ამ პერიოდში, უკრაინას საქართველოში წარმოადგენდეს ნამდვილი ელჩი და არა საელჩოს თანამშრომელი. ჩვენ ვხედავთ, რომ ქვეყნის შიგნით, ოპოზიციის ნაწილი დაკავებულია მხოლოდ ერთი რამით, რამენაირად გადაკიდოს ერთმანეთს უკრაინა და საქართველო. სამწუხაროდ, არიან ჯგუფები უკრაინაშიც, რომლებიც ცდილობენ, რომ გადაკიდონ ერთმანეთს უკრაინა და საქართველო, მაგრამ მე მიხარია, რომ უკრაინის რადასა და საქართველოს პარლამენტს შორის არის თბილი ურთიერთობები. ვფიქრობ, რომ ამ ერთი წლის განმავლობაში ჩვენ ეს დავამტკიცეთ“, – განაცხადა პაპუაშვილმა.

მისივე თქმით, მაშინ, როდესაც ყველა დიდი ქვეყნის საელჩო იკეტებოდა ალყაშემორტყმულ და ბომბების წვიმაში მყოფ კიევში, საქართველოს საელჩოს კარი არცერთი წუთით არ დაკეტილა და საქართველოს დროშა ფრიალებდა ალყაშემორტყმულ კიევში.

„ეს იყო ჩვენი სოლიდარობა, სიტყვით და საქმით. რაც შეეხება სხვა პოლიტიკურ მხარდაჭერას, გუშინწინ გაეროს ასამბლეამ მიიღო ჩვენი ავტორობით ინიცირებული რეზოლუცია, რომელშიც კიდევ ერთხელ გაესვა ხაზი ჩვენს მხარდაჭერას უკრაინის მიმართ

საქართველოში უკრაინის საქმეთა დროებითმა რწმუნებულმა ანდრეი კასიანოვმა დღეს განაცხადა, რომ უკრაინა შეშფოთებულია საქართველოს მთავრობის წარმომადგენლების ანტიუკრაინული რიტორიკით. მისივე თქმით, „ქართული ოცნების“ ცალკეული მოქმედი დეპუტატი აგრძელებს შოიგუს დაკრულზე ცეკვას უკრაინელი ხალხისა და ქართველი მოხალისეების სისხლზე.