რატი ბრეგაძე: საქართველო არის სამართლებრივი სახელმწიფო და ნებისმიერი სასჯელი უნდა აღსრულდეს

საქართველო არის სამართლებრივი სახელმწიფო და ნებისმიერი სასჯელი უნდა აღსრულდეს. ნებისმიერი ბრალდება, რომელიც გაჟღერდება უნდა იყოს მტკიცებულებით გამყარებული. მითუმეტეს, როდესაც ამას აკეთებს სხვადასხვა პოლიტიკური თანამდებობის პირი, რომელ სახელმწიფოსაც არ უნდა წარმოადგენდეს არ აქვს მნიშვნელობა, - ამის შესახებ იუსტიციის მინისტრმა რატი ბრეგაძემ „ქრონიკაში“ ისაუბრა.

„ყველამ ერთად კარგად უნდა დავიმახსოვროთ, რომ ჩვენ ვცხოვრობთ სამართლებრივ სახელმწიფოში, სადაც მტკიცების ტვირთი ეკისრება იმ ადამიანს, რომელიც მეორე მხარეს უყენებს ბრალს. სრული პასუხისმგებლობით ვამბობ, არცერთი მტკიცებულება ამ ადამიანის წამების ან მისდამი არაადამიანური მოპყრობის შესახებ ჩვენ არ გაგვიგია. შესაბამისად ნებისმიერი მსგავსი განცხადება არის მხოლოდ და მხოლოდ პოლიტიკური დღის წესრიგის შემადგენელი ნაწილი. ვინმეს გამოუთხოვა მსჯავრდებული სააკაშვილის მკურნალი ექიმებისგან ინფორმაცია? ეს ადამიანები მკურნალობენ 24 საათის განმავლობაში და ყველაზე სრულყოფილი ინფორმაცია მსჯავრდებული სააკაშვილის ჯანმრთელობის მდგომარეობის შესახებ აქვთ ამ ადამიანებს. ჩვენი და მიხეილ სააკაშვილის მომხრე რადიკალური ჯგუფის ინტერესები ერთმანეთს ვერ ემთხვევა. ჩვენი ინტერესი მდგომარეობს ამ ადამიანის ჯანმრთელობაში. ხოლო ეს ხალხი შეგნებულად ცდილობს, რომ მიხეილ სააკაშვილის ჯანმრთელობის მდგომარეობა გაუარესდეს და ამ მოტივით მოიპოვოს თავისუფლება“, - განაცხადა რატი ბრეგაძემ.