თეა წულუკიანი “ღია მმართველობის პარტნიორობის” წევრ მინისტრებს ხვდება

საქართველოს იუსტიციის მინისტრი “ღია მმართველობის პარტნიორობის” წევრი სახელმწიფოების მინისტრებს ხვდება. თეა წულუკიანმა, რომელიც OGP-ის აღმასრულებელ კომიტეტში საქართველოს წარმოადგენს, ორგანიზაციის თავმჯდომარის რანგში წევრი ქვეყნების იმ მინისტრებთან შეხვედრებს განაგრძობს, რომლებიც “ღია მმართველობის პარტნიორობაში” თავიანთ ქვეყნებს წარმოადგენენ.

კანადის ფინანსთა და შესყიდვების მინისტრთან შეხვედრის შემდეგ, იუსტიციის მინისტრი საფრანგეთისა და იტალიის მთავრობის წევრებს ნიუ იორკში შეხვდა. თეა წულუკიანმა კოლეგა მინისტრებს ის რეფორმები გაუზიარა, რომელსაც საქართველო ახორციელებს და რომელთა შედეგადაც ჩვენი ქვეყანა “ღია მმართველობის პარტნიორობის” თავმჯდომარე გახდა.

“ჩვენ იტალიას ვუზიარებთ სოფლად სერვისების მიწოდების გამოცდილებას, რომელიც საუკეთესოდ ხდება საზოგადოებრივ ცენტრებში, ასევე ელექტრონული სერვისების მიწოდების გამოცდილებას, ბიზნეს სახლის იდეას და სხვა. საფრანგეთს კი აინტერესებს ელექტრონული მონაცემების ერთიანობა და რეფორმებში მოქალაქეთა ჩართულობის მექანიზმები. ცხადია, ამ და სხვა ქვეყნებიდან ჩვენ გავიზიარებთ იმ გამოცდილებას, რაც მათ უკვე დანერგილი და განვითარებულია”, - განაცხადა თეა წულუკიანმა.

„ღია მმართველობის პარტნიორობის“ ინიციატივის თავმჯდომარეობა, რომელიც 75 ქვეყანას აერთიანებს, საქართველომ რამდენიმე დღის წინ გადმოიბარა. ეს პირველი შემთხვევაა, როდესაც საქართველო მაღალი რანგის საერთაშორისო ფორუმის თავმჯდომარეა.

საქართველო „OGP“-ის რიგით მე-6 თავმჯდომარეა. დღემდე პარტნიორობას ხელმძღვანელობდნენ ისეთი ქვეყნები, როგორიცაა: დიდი ბრიტანეთი, ინდონეზია, მექსიკა, სამხრეთ აფრიკა და საფრანგეთი.