ეკა ბესელია საერთაშორისო გამჭვირვალობის ანგარიშს გამოეხმაურა

ეკა ბესელია „საერთაშორისო გამჭვირვალობა - საქართველოს“ იმ ანგარიშს გამოეხმაურა, რომელიც პარლამენტის წევრების შეუთავსებელ საქმიანობაზე აკეთებს აქცენტს.

„პატივს ვცემთ „საერთაშორისო გამჭვირვალობა - საქართველოს“ საქმიანობას, მაგრამ საჭიროა ინფორმაციის ობიექტურად მიწოდება საზოგადოებისთვის“, - განაცხადა ეკა ბესელიამ არასამთავრობო ორგანიზაციის მიერ მომზადებული ანგარიშის კომენტირებისას.

„ყურადღებით ვუსმენთ და ვეცნობით ხოლმე მათ მონაცემებს, ძალიან ხშირად საყურადღებოა მათი მონაცემები, თუმცა ეს არ არის ის შემთხვევა. იყო სხვა შემთხვევებიც, როდესაც არასწორი, არაზუსტი და არარეალური ინფორმაცია გავრცელდა. ყველას ვერ ჩამოვთვლი, მაგრამ ბევრი შემთხვევა აღმოჩნდა ამ ჩამონათვალში, სადაც რეალობას ასცდა ის ფაქტები, რაც გამოქვეყნდა. მაგალითად გედევან ფოფხაძეზეც არის იქ ინფორმაცია, რაც აბსოლუტურად არარეალურია. საუბარია იმაზე, რომ მაქსიმალურად გადამოწმდეს ინფორმაციები, ვიდრე საჯაროდ გაცხადდება“, - აღნიშნა პარლამენტის იურიდიულ საკითხთა კომიტეტის თავმჯდომარემ.

19 სექტემბერს „საერთაშორისო გამჭვირვალობა - საქართველოს" ხელმძღვანელმა ეკა გიგაურმა განაცხადა, რომ პარლამენტში არიან დეპუტატები, რომლებსაც დეკლარაცია არასრულად აქვთ შევსებული, რეალურად კი სხვადასხვა კომპანიის დირექტორები არიან. 

ანგარიში დეპუტატისთვის შეუთავსებელ საქმიანობას მოიცავს, რომლის მიხედვითაც საქართველოს პარლამენტის წევრებს აქვთ კავშირი ბიზნესთან და შესაბამისად, ფლობს წილს სამეწარმეო სუბიექტებში. მაგალითან ილია წულაია წილს ფლობს 31 კომპანიაში, ნინო წილოსანი და კახა ოქრიაშვილი კი 13-13 კომპანიის მეწილეები არიან. არადეკლარირებული ბიზნესაქტივები აქვს პარლამენტის 16 წევრს, აქედან 14 დეპუტატი არის უმრავლესობიდან.

20 სექტემბერს ანგარიში პარლამენტის თავმჯდომარემ ირაკლი კობახიძემ შეაფასა და განაცხადა, რომ "საერთაშორისო გამჭვირვალობის" ანგარიში უპასუხისმგებლოა და მასში ფაქტები და გარემოებები შესწავლილი არ არის.