შალვა პაპუაშვილი ფარულ ჩანაწერებზე: პარლამენტთან მდგომი მოქალაქეებისთვის მნიშვნელოვანი იცოდნენ ვინ არიან სინამდვილეში ის კვაზილიდერები, რომლებიც მათ გვერდში ტრიალებდნენ

პარლამენტთან მდგომი მოქალაქეებისთვის მნიშვნელოვანი იცოდნენ, ვინ არიან სინამდვილეში ის კვაზილიდერები, რომლებიც მათ გვერდში ტრიალებდნენ. გუშინ ორი მათგანის რეალური სახე ვიხილეთ, როდესაც ისინი გეგმავენ და განსჯიან, როგორ შეიჭრან პარლამენტში, - ამის შესახებ პარლამენტის თავმჯდომარემ, შალვა პაპუაშვილმა ბრიფინგზე განაცხადა.

„არსებობენ არასამთავრობო ორგანიზაციები, რომლებიც ამოფარებული არიან ენჯეოსტრუქტურას, სინამდვილეში ეს არის ჩვეულებრივი პოლიტიკური ინსტრუმენტი. როდესაც ვსაუბრობთ სერგი კაპანაძეზე, იცით, რომ ის არის „გრასის“ დამფუძნებელი, ადამიანი, რომელიც მბრუნავი კარის პრინციპით, ხან არის პოლიტიკური თანამდებობის პირი, გახსოვთ, მიხეილ სააკაშვილის ხელისუფლებაში ყოფნის დროს ის იყო მინისტრის მოადგილე, შემდეგ უცბად გახდა არასამთავრობო ორგანიზაციის წარმომადგენელი, შემდეგ ისევ დაბრუნდა პოლიტიკაში და იყო პარლამენტის წევრი „ნაციონალური მოძრაობისგან“, შემდეგ ისევ დაბრუნდა არასამთავრობო სექტორში, ასეთი ხალხის ჩვენება ხდება, თითქოს ეს არის სამოქალაქო საზოგადოება, რაც ასევე სიყალბეა.

სწორედ ასეთი სიყალბე ვნახეთ გუშინ, ადამიანები გეგმავენ საქართველოს საკანონმდებლო ორგანოს, პარლამენტის შტურმით აღებას, საუბარი იყო პარლამენტში შესვლაზე და ა.შ. თქვენ გახსოვთ, აშშ-ში როდესაც იყო კაპიტოლიუმზე შტურმი, რას ნიშნავდა ეს. გუშინ აშშ-ის პრეზიდენტი ჯო ბაიდენი კიდევ ერთხელ გამოეხმაურა ამ საკითხს. ეს არის უდიდესი სირცხვილი, როდესაც პოლიტიკოსები გეგმავენ შეტევას საკანონმდებლო ორგანოზე.

ჩვენ ვნახეთ „სირცხვილიას“ წარმომადგენელი მაქარაშვილი, რომელზეც არაერთხელ გვქონდა საუბარი, როგორც „ნაციონალური მოძრაობის“ ახალგაზრდული ფრთაზე, რომელიც სწორედ რადიკალიზაციას აქეზებს. ამიტომ არის მნიშვნელოვანი, ამ ორგანიზაციების ფინანსები იყოს გამჭვირვალე და, საბოლოო ჯამში, საზოგადოებამ თავისი დასკვნები გამოიტანოს“, - აღნიშნა შალვა პაპუაშვილმა.

გავრცელდა ვიდეო ჩანაწერი, თუ როგორ იგეგმება პარლამენტის შენობის აღება აქციის მსვლელობისას. ვიდეოში ფიგურირებენ გიგა მაქარაშვილი, აკია ბარბაქაძე და გედი ფოფხაძე.

პარლამენტმა „ხალხის ძალის“ მიერ ინიცირებული აგენტების შესახებ ამერიკული კანონის პირველი ვარიანტი პირველი მოსმენით 7 მარტს მიიღო, რასაც საპროტესტო აქციები მოჰყვა. ამის შემდეგ, საქართველოს პარლამენტის თავმჯდომარემ, შალვა პაპუაშვილმა ევროპის საბჭოს ვენეციის კომისიის პრეზიდენტს, კლერ ბაზი მალორისწერილი გაუგზავნა, რომელშიც საქართველოს პარლამენტში წარდგენილ ორ კანონპროექტზე, „უცხოური გავლენის გამჭვირვალობის“ შესახებ და „უცხოური აგენტების რეგისტრაციის“ შესახებ კანონპროექტებზე დასკვნის მომზადებას სთხოვს.

თუმცა, ამის მიუხედავად პროტესტი არ შეწყდა და საბოლოოდ „ქართული ოცნების“ პოლიტიკური საბჭოს, „ხალხის ძალისა“ და საპარლამენტო უმრავლესობის გადაწყვეტილებით, „უცხოური გავლენის გამჭვირვალობის შესახებ“ კანონპროექტი გაწვეულია „უპირობოდ, ყოველგვარი დათქმის გარეშე“.