გიორგი ვოლსკი: თუკი რაიმე საკითხთან დაკავშირებით საზოგადოებაში დაპირისპირება წარმოიშვა, სწორი ნაბიჯია უკან დახევა

თუკი რაიმე საკითხთან დაკავშირებით, საზოგადოებაში დაპირისპირება წარმოიშვა, სწორი ნაბიჯია უკან დახევა: სწორი ნაბიჯია გაწვევა იმ კანონპროექტისა, რომელმაც გამოიწვია ეს დაპირისპირებები, - ამის შესახებ პარლამენტის პირველმა ვიცე-სპიკერმა, გიორგი ვოლსკიმ განაცხადა.

ვოლსკი გამოეხმაურა პარლამენტთან მიმდინარე აქციებს და მოვლენების შესაძლო განვითარებაზე ისაუბრა. მისი თქმით, მმართველი გუნდისთვის მთავარი იყო დაპირისპირების თავიდან აცილება, ხოლო ექსტრემისტული ძალების გეგმა სისხლისღვრასთან და სამოქალაქო დაპირისპირებასთან არის დაკავშირებული.

„დაპირისპირებების არ განვითარება არის მთავარი გეგმა, რაც ჩვენ გაგვაჩნია და ექსტრემისტულ ძალებს გააჩნიათ აბსოლუტურად სხვა გეგმა, რომელიც დაკავშირებულია სისხლისღვრასთან, სამოქალაქო დაპირისპირებასთან და თუნდაც ომთან, რომელზეც პირველად არ თქმულა და ეს მხოლოდ ჩემი მოსაზრება არ არის - სწორედაც მათი განცხადებებიდან შეგვიძლია ვიმსჯელოთ ამ თემასთან დაკავშირებით“, - აღნიშნა ვოლსკიმ.

მისივე თქმით, მშვიდობიანი აქციები ჩვეულებრივი მოვლენაა, რომელიც ყველა განვითარებულ დემოკრატიას ახასიათებს, თუმცა, როდესაც არსებობს სისხლიანი დაპირისპირების განვითარების გეგმა, ეს უკვე სცდება მშვიდობიან აქციას და სხვა კატეგორიაში გადადის.

მშვიდობიანი აქციები ჩვეულებრივი მოვლენაა, რომელიც ყველა განვითარებულ დემოკრატიას ახასიათებს. სამწუხაროდ, ძალიან „დიდი ჯახები“ ხდება ევროპულ დედაქალაქებსა და ქალაქებში, მაგრამ, როდესაც გეგმა არსებობს იმისა, რომ როგორმე სისხლიანი დაპირისპირება განვითარდეს, ეს უკვე სხვა კატეგორიაში უნდა განვიხილოთ. ადამიანები, რომლებიც მოუწოდებდნენ იმას, რომ პოლიტიკურ პროცესებში არ ჩავერთოთ და მოვახდინოთ ის, რა გეგმის მატარებელიც არის დღეს ოპოზიციის მე ვიტყოდი ექსტრემისტული და არა რადიკალური ნაწილი, არის სწორედ იმ პროცესების მომხრე, რომელიც სამწუხაროდ ჩვენს ქვეყანას სერიოზულად დააზიანებს და რამდენიმე ათეული წლით უკან გადაისვრის“, - განაცხადა ვოლსკიმ.

მისი თქმით, ყველას, განსაკუთრებით კი ახალგაზრდებს უნდა განემარტოთ, რომ საქართველო საკუთარ პოზიციას არც საგარეო კურსის და არც სტაბილურობის შენარჩუნების მიმართულებით არ გადაუხვევს.

პარლამენტმა „ხალხის ძალის“ მიერ ინიცირებული აგენტების შესახებ ამერიკული კანონის პირველი ვარიანტი პირველი მოსმენით 7 მარტს მიიღო, რასაც საპროტესტო აქციები მოჰყვა. ამის შემდეგ, საქართველოს პარლამენტის თავმჯდომარემ, შალვა პაპუაშვილმა ევროპის საბჭოს ვენეციის კომისიის პრეზიდენტს, კლერ ბაზი მალორის წერილი გაუგზავნა,რომელშიც საქართველოს პარლამენტში წარდგენილ ორ კანონპროექტზე, „უცხოური გავლენის გამჭვირვალობის“ შესახებ და „უცხოური აგენტების რეგისტრაციის“ შესახებ კანონპროექტებზე დასკვნის მომზადებას სთხოვს.

თუმცა, ამის მიუხედავად პროტესტი არ შეწყდა და საბოლოოდ „ქართული ოცნების“ პოლიტიკური საბჭოს, „ხალხის ძალისა“ და საპარლამენტო უმრავლესობის გადაწყვეტილებით, „უცხოური გავლენის გამჭვირვალობის შესახებ“ კანონპროექტი გაიწვია „უპირობოდ, ყოველგვარი დათქმის გარეშე“.

10 მარტს კი პარლამენტმა „უცხოური გავლენის გამჭვირვალობის შესახებ“ კანონპროექტი ჩააგდო. პროექტის განხილვას მხარი დაუჭირა ერთმა დეპუტატმა, 35 კი წინააღმდეგი იყო. კანონპროექტი კენჭისყრაზე განხილვის გარეშე დადგა