ჰერმან საბო: მე ვერ ვხედავ სიტუაციას, რომ შეგვიძლია ხვალ, ზეგ ან იქით ორშაბათიდან დავსხდეთ და გავაგრძელებთ მუშაობა პროექტებზე, მგონია, რომ რაც რუსთაველზე ხდებოდა, დასრულებული არ არის „ქართული ოცნების“ შიგნით

მგონია, რომ ეს სიტუაცია, რაც ხდებოდა რუსთაველზე, დასრულებული არ არის „ქართული ოცნების“ შიგნით, - ამის შესახებ პარტია „გირჩის“ წევრმა, ჰერმან საბომ „ქრონიკის“ პირდაპირ ეთერში ისაუბრა.

მისი თქმით, საპარლამენტო სამუშაოების განახლებამდე ოპოზიციამ უნდა გაიგოს, თუ როგორ აპირებენ საპარლამენტო საქმიანობს განახლებას.

„მე ვერ ვხედავ სიტუაციას, რომ ახლა შეგვიძლია ხვალ, ზეგ ან იქით ორშაბათიდან დავსხდეთ და გავაგრძელებთ მუშაობა პროექტებზე. არა იმიტომ, რომ რაღაც პირადი დამოკიდებულება მაქვს ვინმეს მიმართ და ვინმეს რუსს ვეძახი ან - არა, არამედ მგონია, რომ ეს სიტუაცია, რაც ხდებოდა რუსთაველზე, დასრულებული არ არის და არ არის დასრულებული „ქართული ოცნების“ შიგნით. მე ვერ წარმომიდგენია ბატონი ვლადიმერ ჩაჩიბაია, რომელიც შეიძლება ვიღაცისთვის „ქართული ოცნების“ რიგითი დეპუტატი იყოს, მაგრამ ეს არის ადამიანი, რომელიც 2008 წელს იბრძოდა რუსების წინააღმდეგ, „ქართულმა ოცნებამ“ ისე მოახერხა, ისეთი სიტუაცია შექმნა, რომ მას ეძახდნენ პრორუსს, რუსს და რაღაცნაირად თითქოს მოუწია მიეღო ეს. ვერ წარმომიდგენია ეს ადამიანი როგორ მოახერხებს „ქართულ ოცნებაში“ მუშაობა შეუთავსოს თავის განვლილ ცხოვრებას. ჯერჯერობით ის პროცესი, რომელიც „ქართულ ოცნებაში“ მიდის და არ ჩანს გარეთ, სანამ ეს არ დასრულდება, არ გვეცოდინება ძირეულად რა სახის კრიზისი გვქონდა და რა რეალობა გვაქვს დღეს. ოპოზიციამ ბევრი რამ არ იცის, მაგალითად, როგორ ვაგრძელებთ პოლიტიკურ ცხოვრებას. მგონია, რომ სანამ ახალ სამუშაო პროცესზე გადავალთ, სლენგი რომ ვიხმაროთ, მგონია, რომ რაღაცები უნდა „გაიასნდეს“, - აღნიშნა ჰერმან საბომ.

მან ასევე ისაუბრა 12 რეკომენდაციის შესრულებასა და საპარლამენტო საქმიანობის გაგრძელებაზე.

„რომც მოხდეს კუპირება ამ პრობლემის და ჩვენ სამუშაო პროცესზე გადასვლა მოვახერხოთ, ვერ დავეთანხმები, რომ მხოლოდ ტექნიკური ნაწილიღა დაგვრჩა მაგალითად საერთო სასამართლოების ნაწილში, ეს საერთოდ არ არის ასე. თუ „ქართული ოცნება“ აქამდე უარყოფდა, რომ რაიმე კლანურ გავლენებს აქვს ადგილი სასამართლო სისტემაში და პრობლემები არ არსებობს იუსტიციის სისტემაში, ვერ ვხდები, როგორ უნდა გადათქვან და დავიწყოთ მუშაობა ამ პრობლემაზე. თუ „ქართულ ოცნებას“ უნდა პრორუსული შარავანდედიდან გამოვიდეს, მგონი თვითონ უნდა აიღოს ხელში ყველა ის ბერკეტი, რაც აქვს და ერთპიროვნული ძალაუფლებების წინააღმდეგ კანონების მიღება დაიწყოს, მათ შორის სასამართლოს მიმართულებით“, - განაცხადა საბომ.