„იმედმა“ რამდენიმე არასამთავრობო ორგანიზაციას მათ მიერ შესრულებული საქმის, ბიუჯეტისა და დონორების შესახებ ინფორმაციის გასაჯაროება სთხოვა, თუმცა ინფორმაცია, ფაქტობრივად, არავინ გასცა

„იმედმა“ რამდენიმე არასამთავრობო ორგანიზაციას გაუგზავნა წერილი, რომელიც მათ მიერ შესრულებული საქმის, ბიუჯეტისა და დონორების შესახებ ინფორმაციის გასაჯაროებას ეხებოდა, თუმცა ინფორმაცია, ფაქტობრივად, არავინ გასცა.

„იმედის“ მარტივ კითხვას ორგანიზაციების უმეტესობამ შეურაცხყოფით უპასუხა და მათ შორის, არ იყო გასაკვირი, რომ ელენე ხოშტარიაც მოხვდა. ხოშტარიას უცენზურო პასუხი „იმედმა“ მისი არასამთავრობო ორგანიზაციის სახელით, მაგრამ „დროას“ პარტიული ბეჭდით მიიღო.

„იმედის კვირამ“ მიმართა 7 ორგანიზაციას წერილით, მოეწოდებინათ ინფორმაცია 2022 წელს განხორციელებული პროექტების, მათი ბიუჯეტებისა და დონორების შესახებ. რედაქციას პასუხი დაუბრუნა „მმართველობის მონიტორინგის ცენტრმა“ და „პროგრესცენტრმა“ - მათ მიგვითითეს ვებგვერდზე, სადაც წერია მხოლოდ პროექტის სახელი, დონორი და გრანტის ოდენობა, სხვა ინფორმაცია კი საჯარო არაა.

რედაქცია ამ დრომდე ელოდება პასუხს გიორგი მშვენიერაძის „დემოკრატიის მცველებისგან“, რომელიც დაგვპირდა, რომ შესაბამის ინფორმაციას მივიღებდით. ცინიკური და შეურაცხმყოფელი Facebook-პოსტებით გამოხატეს პოზიცია „ინდივიდუალური თავისუფლების ინსტიტუტმა“ და „ამომრჩეველთა განათლების საზოგადოების“ დამფუძნებელმა, თამარ ჩერგოლეიშვილმა.