ოპოზიციის ლიდერთა საბჭოს პირველი შეხვედრა მომდევნო კვირაში გაიმართება

ოპოზიციის ლიდერთა საბჭოს პირველი შეხვედრა მომდევნო კვირაში გაიმართება, საბჭოს პასუხისმგებელ მდივნად კი პაატა დავითაია აირჩიეს.

ოპოზიციური პარტიების ლიდერები აცხადებენ, რომ საბჭო კონკრეტულ ნაბიჯებს გადადგამს, ხოლო იმ შემთხვევაში, თუ მათი ქმედებები უშედეგო აღმოჩნდება, საპროტესტო აქციებსაც არ გამორიცხავენ.

"აქცია არ არის ერთადერთი და აუცილებელი მოვლენა პოლიტიკური ბრძოლისა, მაგრამ, რა თქმა უნდა, პოლიტიკური ბრძოლა არც ამას გამორიცხავს. მანამდე ჩვენ შეგვიძლია სხვადასხვა სახის პოლიტიკური აქტიურობის დემონსტრირება",- განაცხადა მამუკა კაციტაძემ.

ოპოზიციის ლიდერების საკოორდინაციო საბჭოს შექმნის თაობაზე ჟურნალისტებს დღეს ნინო ბურჯანაძემ განუცხადა.

მისი თქმით, საბჭო მოახლოებულ არჩევნებსა და გაყალბების საფრთხეებზეც იმუშავებს. მისივე თქმით, პოზიცია იმასთან დაკავშირებით, რომ ხელისუფლების მიერ კონსტიტუციის შემოთავაზებული ვერსია მისაღები არ არის ერთიანია.

"ამ წუთში არანაირი საპროტესტო აქცია არ დაგეგმილა. მუშობას საკოორდინაციო საბჭოს ფორმატში გავაგრძელებთ. თუ ხელისუფლება გააკეთებს იმავეს, რაც გააკეთა საპარლამენტო არჩევნების დროს, დარწმუნებული ვარ, რომ ოპოზიციური სპექტრის 80%, თუ 100% არა არჩევნებს არალეგიტიმურად გამოაცხადებს და  შესაბამისს ნაბიჯებსაც გადადგამს", - განაცხადა ნინო ბურჯანაძემ.

ოპოზიცია მომავალი არჩევნებისთვის პროპორციულ სისტემაზე გადასვლას ითხოვს.

პარლამენტს გარეთ მყოფ პოლიტიკურ პარტიებში აცხადებენ, რომ ხელისუფლება კონსტიტუციის არსებულ პროექტს კონსენსუსის გარეშე ძალადობრივად მაინც მიიღებს, რასაც მათი მხრიდან შესაბამისი რეაგირება მოჰყვება.

"დათანხმებაზე საუბარი არ არის, რადგან ოპოზიციის ამოსავალი მოთხოვნა იყო პროპორციული საარჩევნო სისტემა", - ეს განცხადება ინტერპარტიული ჯგუფის შეხვედრის დაწყებამდე პაატა დავითაიამ, მმართველი გუნდის შეთავაზებასთან დაკავშირებით გააკეთა.

"ის რაც გააკეთა ხელისუფლებამ, რა თქმა უნდა, წინ გადადგმული ნაბიჯია, მაგრამ ეს არის მხოლოდ და მხოლოდ ერთჯერადად და მხოლოდ დროებითი სქემები", - განაცხადა პაატა დავითაიამ. 

თავის მხრივ, პარლამენტის იურიდიულ საკითხთა კომიტეტის თავმჯდომარე ეკა ბესელია მიიჩნევს, რომ კონსტიტუციური პროექტი დემოკრატიული და პროგრესულია.

"ყველა განცხადება იმის თაობაზე, რომ კონსტიტუციაზე ძალადობა ხდება უსამართლოა. ხელისუფლება ისეთ დათმობებზე წავიდა, როგორიც არ მახსოვს ოდესმე ყოფილიყო საკონსტუტიციო ცვლილებების მომზადების დროს. რაც შეეხება ვენეციის კომისიას, ძალიან გვაინტერესებს, შეფასება როგორი იქნება, მაგრამ მოლოდინი მაქვს, რომ დასკვნა დადებითი უნდა იყოს, რადგან 23 რეკომენდაციის აბსოლუტური უმრავლესობა გაზიარებულია და რამდენიმე ტექნიკური საკითხი იყო, რომელიც მესამე მოსმენისას დაზუსტდება. კრიტიკულ დასკვნას არ ველოდები", - აღნიშნა ბესელიამ.

პარლამენტის თავმჯდომარე ირაკლი კობახიძე კი პროპორციული სისტემის ამოქმედების გადავადებას ოპოზიციას აბრალებს.

კობახიძის თქმით, ოპოზიცია მზად არ იყო, მხარი დაეჭირა საკონსტიტუციო ცვლილებებისთვის იმ პირობებშიც კი, თუ ქვეყანა პროპორციულ საარჩევნო სისტემაზე 2020 წელს გადავიდოდა. 

"ჩვენთვის პრინციპულად მნიშვნელოვანი იყო პროპორციულ სისტემაზე გადასვლა და ეს მიზანი მიღწეულია. მართალია, შემდეგი არჩევნები შერეული სისტემით ჩატარდება, მაგრამ 2020 წლის ნოემბერში სრულფასოვნად ამოქმედდება საკონსტიტუციო ცვლილებები და 2020 წლის შემდეგ, არჩევნები  სრულად პროპორციული სისტემით ჩატარდება", - განაცხადა კობახიძემ.

როგორც 21 სექტემბერს გახდა ცნობილი, 2020 წლის არჩევნებში პოლიტიკურ პარტიებთან ერთად ბლოკებიც მიიღებენ მონაწილეობას, 2024 წლისთვის კი საარჩევნო სისტემა სრულად პროპორციულზე გადავა და ბონუსების სისტემა აღარ იქნება.