არჩილ თალაკვაძე: კეზერაშვილის განცხადებები შეიცავს პოლიტიკური კორუფციის ნიშნებს, მან პრაქტიკულად თქვა, რომ აფინანსებს ოპოზიციას, ხოლო პარტიებს ეს არ აქვთ დეკლარირებული

პრაქტიკულად, კეზერაშვილმა თქვა, რომ აფინანსებს ოპოზიციას, ხოლო ოპოზიციურ პარტიებს ეს არ აქვთ დეკლარირებული. ეს არის ძალიან შემაშფოთებელი განცხადება და არღვევს კანონით დადგენილ წესებს, რაც „პარტიების დაფინანსებისა და საქმიანობის“ შესახებ არსებობს, - ამის შესახებ ჟურნალისტებს პარლამენტის ვიცე-სპიკერმა არჩილ თალაკვაძემ განუცხადა.

მისივე თქმით, ოპოზიციამ განმარტებები უნდა გააკეთოს იმაზე, რაზეც კეზერაშვილმა ისაუბრა.

„პოლიტიკური ოპოზიციის დაფინანსებაზე, რომელზეც მან გუშინ საჯაროდ ისაუბრა, არაფერია მოცემული ოპოზიციური პარტიების დეკლარაციებში, ამიტომ ოპოზიციური პარტიები ვალდებულნი არიან, საჯაროდ გასცენ პასუხი იმ განცხადებებს, რაც კეზერაშვილმა გააკეთა მედიის საშუალებით. პრაქტიკულად, მან თქვა, რომ აფინანსებს ოპოზიციას, ხოლო ოპოზიციურ პარტიებს ეს არ აქვთ დეკლარირებული. ეს არის ძალიან შემაშფოთებელი განცხადება და არღვევს კანონით დადგენილ წესებს, რაც „პარტიების დაფინანსების და საქმიანობის“ შესახებ არსებობს.

რაც შეეხება მის სხვა განცხადებებს, მან საზოგადოებას უთხრა, მილიარდერი გავხდი კანონიერადო, მაშინ, როცა თავდაცვის ბიუჯეტიდან მოპარული აქვს ფული, პოლიტიკურ პარტიებსა და მედიას უკანონოდ აფინანსებს, მისი ფულისა და ფინანსების წარმომავლობა ბუნდოვანია, სასამართლოს გადაწყვეტილება აქვს მიღებული, რომ ბიუჯეტის ძარცვას ჰქონდა ადგილი. მან საზოგადოებას კიდევ ერთხელ შეაყარა თვალებში ნაცარი და უთხრა, რომ გამჭვირვალე ბიზნესით გამდიდრდა და დღეს კეთილშობილი ინტერესები აქვს, რომ რადიკალური ოპოზიცია დააფინანსოს. ვინ დაიჯერებს ამას?! ეს არის სიცრუე. ყველაფერი დევს ხელს გულზე და ახლა უკვე დროა, რაზეც მან ილაპარაკა, მოვისმინოთ ამაზე ოპოზიციური პარტიების განმარტებები“, - განაცხადა თალაკვაძემ.