ირაკლი ქადაგიშვილი: საარჩევნო კოდექსში არსებული „იძულებითი“ ჩანაწერის გამოა, რომ უკვე მესამე წელია ცესკოს თავმჯდომარე არ გვყავს, ამიტომ ეს აბსურდული ჩანაწერი უნდა მოიხსნას

საარჩევნო კოდექსში არსებული „იძულებითი“ ჩანაწერის გამოა, რომ უკვე მესამე წელია ცესკოს თავმჯდომარე არ გვყავს, ამიტომ ეს აბსურდული ჩანაწერი უნდა მოიხსნას, - ამის შესახებ საპარლამენტო უმრავლესობის წევრმა, ირაკლი ქადაგიშვილმა „ქრონიკაში“ განაცხადა.

„ჩვენ გვაქვს ახალი საარჩევნო კოდექსი მიღებული, სადაც მთელ რიგ ცვლილებებთან ერთად შემოღებულია ელექტრონული ხმის მიცემის წესი. ამის ტესტირება უკვე მოხდა და ვნახეთ, რომ მართლაც საუკეთესო საარჩევნო კოდექსი გვაქვს და ყველაზე თანამედროვე ტექნოლოგიების გამოყენებით იწყება საქართველოში საარჩევნო პროცესის მართვა. ამავდროულად, გვაქვს ისეთი, შეიძლება ითქვას, იძულებითი ჩანაწერი, რომელიც 2020 წლის არჩევნების შემდეგ ოპოზიციის მიერ შექმნილმა კრიზისმა გამოიწვია. შემოგვთავაზეს, რომ 90 ხმით, არა სიითი უმრავლესობით, არამედ ე.წ. კვალიფიციური უმრავლესობით უნდა მომხდარიყო ცენტრალური საარჩევნო კომისიის თავმჯდომარის არჩევა, რამაც დაგვანახა ერთი რეალობა, რომ 2020 წლის არჩევნების შემდეგ ჩვენ ცესკოს თავმჯდომარე ვერ ავირჩიეთ. იმიტომ, რომ ფაქტობრივად პირიქით ხდებოდა - ხელისუფლების მიტაცება უმცირესობის მხრიდან. რას ნიშნავს ეს?! პირობითად თუ „ნაციონალური მოძრაობა“ მისთვის სასურველ კანდიდატურას არ დააყენებდა, მაშინ სხვანაირად ცენტრალური საარჩევნო კომისიის თავმჯდომარე ვერ აირჩეოდა. ამიტომ ეს აბსურდული ჩანაწერი უნდა მოიხსნას. მსოფლიოს არცერთ ქვეყანაში არ არის ეს ე.წ. კვალიფიციური უმრავლესობა, რადგან ვინც ოპოზიციას სურს, ის უნდა აირჩიო აპრიორი, სხვა არჩევანი არ გაქვს. ამიტომ არსებობს მსოფლიოში, რომ უმრავლესობა ირჩევს თანამდებობაზე პირებს. აქედან გამომდინარეა ის სურათი, რაც ჩვენ მივიღეთ საქართველოში, რომ უკვე მესამე წელიწადია ცესკოს თავმჯდომარე ვერ ავირჩიეთ. აქედან გამომდინარე ვამბობთ, რომ კანონი უნდა იყოს სამართლიანობასთან და ასევე რეალობასთან ახლოს“, - აღნიშნა ქადაგიშვილმა.

ცესკო-ს თავმჯდომარეობის და ე.წ. პროფესიული წევრობის კანდიდატების შერჩევის და პარლამენტისთვის წარდგენის პრეროგატივა პრეზიდენტის ნაცვლად, პარლამენტის თავმჯდომარეს ექნება. იცვლება მათ არჩევასთან დაკავშირებული პროცედურა და კვორუმი - თუკი პარლამენტი ცესკო-ს თავმჯდომარესა და წევრებს სრული შემადგენლობის უმრავლესობით (76 ხმა) მხარს დაუჭერს, ისინი თანამდებობას 5 წლის ვადით დაიკავებენ. ამ მიმართულებით „საარჩევნო კოდექსსა“ და პარლამენტის რეგლამენტში ცვლილებები ფრაქცია “ქართული ოცნების“ დეპუტატებმა მოამზადეს და ის ბიუროს უახლოეს სხდომაზე წარედგინება.