ირაკლი ღარიბაშვილი: როდესაც ჩვენ სისხლი დავღვარეთ არა მარტო საქართველოში, არამედ ნატო-ს მისიებში, ავღანეთში, ერაყში, სანაცვლოდ მივიღეთ ის, რომ აგვისტოს ომის შემდეგ არავის გადაუხედავს რუსეთთან პოლიტიკისთვის

თქვენ წარმოადგენთ „ნაციონალური მოძრაობის“ ტელევიზიას, მე გისვამთ კითხვას, რატომ არ უსვამთ იგივე კითხვას ხოშტარიას, რომელიც 10 წლის წინ ამბობდა, რომ ფრენები, უვიზო რეჟიმი კარგია, - ასე უპასუხა პრემიერ-მინისტრმა ირაკლი ღარიბაშვილმა ჟურნალისტის კითხვას, რომელმაც იკითხა, რატომ აღადგინა საქართველომ პირდაპირი ფრენები რუსეთთან იმ ფონზე, როდესაც მთელმა ევროპამ შეაჩერა ფრენები რუსეთთან და მიუხედავად იმისა, რომ ისრაელშიც, თურქეთში, ბევრ აზიურ ქვეყანაში არის პირდაპირი ფრენები, თუმცა ევროკავშირისგან ისინი კანდიდატის სტატუსს არ ელოდებიან.

„თქვენ ხართ საქართველოს მოქალაქე, წესით ყველა მოქალაქე უნდა ზრუნავდეს ჩვენი ქვეყნის ინტერესების დაცვაზე. თქვენ რომ იყოთ ობიექტური ჟურნალისტი, მაგ კითხვას დაუსვამდით იგივე ხოშტარიას, სააკაშვილის პარტიის წევრებს, მაშინ მეტად დამაჯერებელი იქნებოდა თქვენი კითხვა. თქვენ წარმოადგენთ „ნაციონალური მოძრაობის“ ტელევიზიას, მე გისვამთ კითხვას, რატომ არ უსვამთ იგივე კითხვას ხოშტარიას, რომელიც 10 წლის წინ ამბობდა, რომ ფრენები კარგია, უვიზო რეჟიმი კარგია, ვაჭრობა კარგია. თქვენ მაგ კითხვით ნუ მოდიხართ ჩემთან. ერთი რამ მინდა გითხრათ, დასავლეთის ქვეყნები ჩვენი ომის შემდეგ, როდესაც ქართველი ბიჭები დაიღუპნენ, ჩვენ სისხლი დავღვარეთ და არა მარტო საქართველოში, არამედ ნატო-ს მისიებში, ავღანეთში, ერაყში, ყველგან ვიყავით ღირსეულად წარმოჩენილი. ჩვენ სისხლი დავღვარეთ, სიცოცხლე გავიღეთ, მივიღეთ სანაცვლოდ რა - მივიღეთ ის, რომ აგვისტოს ომის შემდეგ, არავის გადაუხედავს რუსეთთან პოლიტიკა, არავითარი ცვლილება არ შეუტანიათ პოლიტიკაში. ჩემი მიზანია, ჩვენი ქვეყნის გადარჩენა და დაცვა, მათ შორის თქვენი ინტერესების დაცვა. საკმაოდ დეტალურად განვმარტეთ, რომ არცერთი სანქცირებული ავიაკომპანია, თვითმფრინავი არ იფრენს საქართველოში. ამით ყველაფერია ნათქვამი. მე მქონდა პირადად ჩვენს ევროპელ კოლეგებთან, ლიდერებთან ახლა ირლანდიაში შეხვედრები და მე მათ ავუხსენი, რომ ეს არის ჩვენი ეროვნული ინტერესების შესაბამისი. აქ ახალი, უცხო არაფერია. განვმარტე, რომ ეს არის შემადგენელი ეკონომიკური, სავაჭრო ურთიერთობების. ვისაც არ უნდა, რომ ქვეყანამ დაძლიოს სიღარიბე, უმუშევრობა, ვაჭრობა, ეკონომიკა იყოს, ის ძალიან მარტივად უნდა ითქვას, რომ ჩვენი ქვეყნის მტერია“, - განაცხადა ღარიბაშვილმა.

კითხვაზე, რატომ გადაწყვიტა ახლა პუტინმა პირდაპირი ფრენების აღდგენა და ხომ არ უკავშირდება ეს საქართველოს მოლოდინს ევროკავშირისგან კანდიდატის სტატუსზე, პრემიერ-მინისტრმა განაცხადა, რომ მთავარი არის შედეგი.

„მთავარი არის შედეგი. ჩვენ უნდა ვიფიქროთ შედეგზე, საქმეზე უნდა ვიფიქროთ. საქმე არის ის, რომ ყველაფერი ეს, რაც მე ჩამოვთვალე, ემსახურება ჩვენი ქვეყნის ინტერესების დაცვას. აიოლებს, უმარტივებს ჩვენს მოქალაქეებს გადაადგილებას, ვაჭრობას განავითარებს, ასე რომ, ყველაფერი არის შესაბამისობაში ჩვენს ეროვნულ პოლიტიკასთან და ასევე საერთაშორისო სანქციებთანაც. ასე რომ, აქ კითხვები არ არსებობს“, - განაცხადა ღარიბაშვილმა.