დავით ნარმანია ბრიტანულ მხარეს პასუხობს

საქართველო - უელსის მატჩზე გულშემატკივართა უსაფრთხოების თვალსაზრისით პრობლემას ვერ ვხედავთ, - ასე გამოეხმაურა დედაქალაქის მერი დავით ნარმანია ბრიტანული მხარის სპეციალურ გაფრთხილებას, რომელიც ქვეყნის სახელმწიფო ვებგვერდმა საქართველო - უელსის საფეხბურთო მატჩამდე, თბილისში გამომგზავრების მსურველი თანამოქალაქეებისთვის გამოაქვეყნა. ინფორმაციას 1tv ავრცელებს.

"რაიმე სახის არსებით საფრთხეს ვერ ვხედავ. ცალკეული საკითხები, რაც საელჩოს მხრიდან არის გამოყოფილი, ბუნებრივია, ყურადღება მისაქცევია. ბუნებრივია, ბიოტუალეტები იქნება, უსაფრთხოების ზომები ასეთ შემთხვევაში კიდევ უფრო მკაცრდება. ასე რომ, ყველაფერს გავითვალისწინებთ და მატჩი მოწოდების სიმაღლეზე ჩატარდება ", - აღნიშნა დავით ნარმანიამ. 

რჩევები შეეხება როგორც თბილისის სატრანსპორტო სისტემას, ასევე მგზავრობის ტარიფებს, კრიმინალის დონეს, ფეხით სიარულთან დაკავშირებულ საფრთხეებს.

უწყება მოქალაქეებს თბილისში დიდი ბრიტანეთის საელჩოს მისამართს, საგანგებო სიტუაციების სამსახურის ტელეფონის ნომერს 112-სა და თბილისის რუკასაც აძლევს.

რამდენიმე რჩევა ასეთია:

თუ ტაქსს მრიცხველი არ აქვს, მძღოლს თანხაზე ჩაჯდომამდე მოელაპარაკეთ. აეროპორტიდან თბილისი ცენტრამდე ტაქსით მგზავრობა დაახლოებით 30 ლარი ღირს.

თბილისის ქუჩებში ტაქსის გაჩერება ადვილია, თუმცა ამის გაკეთებისაგან თავი უნდა შეიკავოთ ღამით, განსაკუთრებით თუ ქალი ხართ, რადგან ძარცვის ინციდენტები ფიქსირდება

შშმ მოგზაურებისათვის თბილისში გადაადგილება შესაძლოა რთული იყოს. ქვაფენილები ხშირად უსწორმასწოროა.

კრიმინალის დონე თბილისში ძირითადად დაბალია, თუმცა ქალაქცის ცენტრში  ყაჩაღობები დრო და დრო ხდება სიბნელეში. არსებობს გარკვეული ინფორმაცია სექსუალურ თავდასხემებზე ტაქსის მძღოლების მხრიდან.
გზის გადაკვეთისას ყოველთვის ფხიზლად იყავით, წითელი შუქნიშანი და ზებრა გადასასვლელი არ ნიშნავს იმას, რომ ავტომობილი აუცილებლად გაჩერდება. გამოიყენეთ მიწისქვეშა გადასასვლელები.

თუ ზიხართ ტრანსპორტში, რომელიც ძალიან სწრაფად მოძრაობს, მძღოლს შენელების ინსტრუქცია უნდა მისცეთ.

პატივი ეცით ადგილობრივ ტრადიციებს, კანონებსა და რელიგიას. დაუფიქრდით თქვენს ქცევებს და იმას, თუ როგორ შეიძლება ის ინტერპრეტირებული იყოს სხვა კულტურის ან რელიგიური შეხედულებების მქონე ადამიანების მხრიდან.

ქალაქში საზოგადოებრივი ტუალეტები არ არსებობს. შესაბამისად უნდა შეხვედიეთ კაფე/ბარებში და რაიმე შეიძინოთ იმისათვის, რომ დაწესებულებით ისარგებლოთ. არ მოშარდოთ ქუჩაში, ეს შეურაცხყოფაა.

აღსანიშნავია, რომ საქართველოს ეროვნული საფეხბურთო ნაკრები 6 და 9 ოქტომბერს, მსოფლიოს 2018 წლის ჩემპიონატის შესარჩევი ეტაპის ბოლო ორ შეხვედრას ჩაატარებს. პირველი შეხვედრა 6 ოქტომბერს უელსის ნაკრებთან არის დანიშნული. 

უელსის ეროვნული ნაკრების მთავარმა მწვრთნელმა კრის კოულმენმა საქართველოსა და ირლანდიის წინააღმდეგ მოახლოებული მატჩებისთვის შემადგენლობა უკვე დაასახელა.