შალვა პაპუაშვილი: როდესაც საქმე ეხება ევროინტეგრაციას, ამაში მნიშვნელოვანი როლი აქვს ჩვენს დიასპორას, რათა ევროპელებს დაანახონ, თუ რა არის საქართველოს როლი ევროპაში

მინდა მადლობა გადაგიხადოთ, რადგან თქვენ ხართ ის ადამიანები, რომლებიც ქმნით საქართველოს სახეს ქვეყნის გარეთ. აცნობთ ჩვენს ქვეყანას და ამავე დროს, თქვენ ხართ ის ხალხი, რომელიც ქვეყანასთან თქვენი სოციალური კავშირის შენარჩუნებით, ასევე ამდიდრებთ თქვენი გამოცდილებით, - ამის შესახებ პარლამენტის თავმჯდომარე, შალვა პაპუაშვილმა ქართული დიასპორის დღისადმი მიძღვნილ ფორუმზე სიტყვით გამოსვლისას განაცხადა.

„ჩვენ გვყავს დიდი დიასპორა. ეს დიასპორა სულ უფრო მეტად და მეტად არის წარმატებული და მნიშვნელოვანია, რომ ამ მხრივაც გავაძლიეროთ ჩვენი დიასპორა. ჰქონდეთ მათ საკმარისი ინფორმაცია იმისთვის, რომ ქვეყნის ინტერესები წარმოადგინონ ქვეყნის გარეთ. განსაკუთრებით დღეს, როდესაც საქმე ეხება ევროინტეგრაციას, ამაში მნიშვნელოვანი როლი აქვს ჩვენს დიასპორას, რომ ევროპელებს დაანახონ, მათ, ვინც ჯერ კიდევ არ იცნობს, არ იცის, თუ რა არის საქართველოს როლი ევროპაში. გუშინ გამოსვლაში ვთქვი, რომ საქართველო ვერ იქნება სრულყოფილი ევროპის გარეშე. თუმცა, ეს პირიქითაცაა. ევროპაც ვერ იქნება სრულყოფილი საქართველოს გარეშე, რადგან საქართველო არის მონაწილე ევროპის შექმნის, არ გადავალ ათასწლეულების უკან რა იყო, მაგრამ ჩვენ ვართ სწორედ შემოქმედი ქრისტიანული, ევროპული კულტურისა ყველა განზომილებაში. დაწყებული ღვინიდან და გაგრძელებული მათ შორის, ქრისტიანული სწავლებებით, ხელოვნებაში ჩვენი წვლილით. აღარაფერს ვიტყვი სპორტზე - განსაკუთრებით ბოლო პერიოდში. ამიტომ, ეს ჩვენმა დიასპორებმა უნდა მოახერხონ, ვინაიდან ისინი არიან ბუნებრივად ინტეგრირებული იმ საზოგადოებაში და მათ უფრო მეტი დამაჯერებლობა აქვთ და მეტი შესაძლებლობა, ეს აუხსნან საკუთარ მეგობრებს, თანამშრომლებს ქვეყნის გარეთ“, - განაცხადა პაპუაშვილმა.

მან პარლამენტის მხრიდან ფორუმის მონაწილეებს მხარდაჭერა აღუთქვა.

„ამდენად, ერთი მხრივ, მინდა მადლობა გადაგიხადოთ, რადგან თქვენ ხართ ის ადამიანები, რომლებიც ქმნით საქართველოს სახეს ქვეყნის გარეთ. აცნობთ ჩვენს ქვეყანას და ამავე დროს, თქვენ ხართ ის ხალხი, რომელიც ქვეყანასთან თქვენი სოციალური კავშირის შენარჩუნებით, ასევე ამდიდრებთ თქვენი გამოცდილებით, რომელსაც დიასპორაში იღებთ. მინდა მოგილოცოთ საქართველოს დამოუკიდებლობის დღე, დიასპორის დღე! გისურვოთ ყველას წარმატება. რაც მთავარია, დაბრუნდებით, თუ არ დაბრუნდებით, ეს ერთი საკითხია, მაგრამ ჩვენ, როგორც ერმა თავი უნდა ვიგრძნოთ ერთიანად, მიუხედავად იმისა, სად ვიქნებით, ვფიქრობ, ესაა ყველაზე მთავარი და ამას გისურვებთ თქვენ და ვუსურვებ ჩვენს ერს“, - განაცხადა პაპუაშვილმა.

საგარეო საქმეთა სამინისტროში ქართული დიასპორის დღისადმი მიძღვნილი ფორუმი იმართება.