მარინა კალიურანდი: არსებობს შესაძლებლობების უნიკალური ფანჯარა და არ ვიცით, ეს ფანჯარა რამდენ ხანს იქნება ღია. შესაძლოა ის მალე დაიხუროს და ამიტომ ეს ისტორიული შანსი უნდა გამოიყენოთ

საქართველოს მთავრობამ და საპარლამენტო უმრავლესობამ უნდა შეასრულოს მოცემული პირობა - არა ჩვენთვის, არამედ, პირველ რიგში, საკუთარი მოქალაქეებისთვის, რომლებიც ჭეშმარიტად ისწრაფვიან ევროკავშირში ინტეგრაციისკენ, - ამის შესახებ ევროპარლამენტარმა მარინა კალიურანდმა საქართველო-ევროკავშირის ასოცირების საპარლამენტო კომიტეტის მე-12 შეხვედრის გახსნაზე განაცხადა.

„არსებობს შესაძლებლობების უნიკალური ფანჯარა და არ ვიცით, ეს ფანჯარა რამდენ ხანს იქნება ღია. შესაძლოა ის მალე დაიხუროს და ამიტომ ეს ისტორიული შანსი უნდა გამოიყენოთ. რამდენადაც ჩვენ ვაფასებთ საქართველოსთან ურთიერთობას, უნდა ვისაუბროთ არასასიამოვნო ფაქტებზეც, როცა ეს საჭიროა, რადგან არ ვცდილობთ ვინმეს მფარველობას. ჩვენ ვსაუბრობთ როგორც მეგობრები, პარტნიორები და თანასწორები.

რამდენიმე დღის წინ წავიკითხე საქართველოს პარლამენტის თავმჯდომარის, შალვა პაპუაშვილის განცხადება, რომ კომისიის მიერ გაცემული 12 რეკომენდაციის 80% უკვე შესრულებულია და რომ ის ამის შედეგად ევროპელი პარტნიორებისგან ამ შემოდგომაზე სამართლიან შეფასებას ელის. სამწუხაროდ, მინდა ვთქვა, რომ ეს განცხადებები კითხვებს ბადებს იმ ინფორმაციასთან დაკავშირებით, რომელიც გვესმის საქართველოს სამოქალაქო საზოგადოებისგან და ასევე კომისიისა და დასავლელი პარტნიორებისგან“, - განაცხადა კალიურანდმა.