ანდრეი პლენკოვიჩი: საქართველოს აქვს ამბიცია გახდეს ევროკავშირის, ნატოს წევრი და ჩვენ მხარს ვუჭერთ ამ მისწრაფებებს

საქართველოს აქვს ამბიცია გახდეს ევროკავშირის, ნატოს წევრი და ჩვენ მხარს ვუჭერთ ამ მისწრაფებებს,- ამის შესახებ ხორვატიის პრემიერ-მინისტრმა ანდრეი პლენკოვიჩმა, საქართველოს პრემიერ-მინისტრის ოფიციალური ვიზიტისას გამართულ ერთობლივ ბრიფინგზე განაცხადა.

მისივე თქმით, საქართველო ასრულებს ევროკომისიის მიერ მინიჭებულ 12 რეკომენდაციას და იმედოვნებს, რომ საქართველოსთან დაკავშირებით იქნება ინსტიტუციური პროგრესი და ევროკავშირის გზაზე წინსვლა.

„ნება მომეცით მივესალმო ირაკლი ღარიბაშვილს, საქართველოს პრემიერ-მინისტრს. ეს არის მისი პირველი ოფიციალური ვიზიტი ხორვატიის რესპუბლიკაში ბოლო 30 წლის განმავლობაში მას შემდეგ, რაც ვაღიარეთ ერთმანეთის დამოუკიდებლობა. მადლობას ვუხდი პრემიერს ვიზიტისთვის.

დღეს საუბარი გვქონდა ურთიერთობების გაუმჯობესებაზე ხორვატიასა და საქართველოს შორის. ჩვენ ასევე შევეხეთ ევროპულ პერსპექტივას და იმ ამბიციებს, რომელიც ქვეყანას გააჩნია NATO-ში გაწევრიანების თაობაზე. ვისაუბრეთ უკრაინაში მიმდინარე მოვლენებზე, რუსეთის აგრესიაზე, საქართველოში არსებულ ეკონომიკურ მდგომარეობაზე და ასევე, რა თქმა უნდა შევეხეთ სამხრეთ- აღმოსავლეთ ევროპაში არსებულ მდგომარეობას. ხორვატია და საქართველო მოსახლეობის, გეოგრაფიის ნიშნით ძალიან ჰგავს ერთმანეთს. საქართველოს აქვს ამბიცია გახდეს ევროკავშირის, ნატოს წევრი და ჩვენ მხარს ვუჭერთ ამ მისწრაფებებს. გასულ წელს მოგეხსენებათ, ევროსაბჭოში ჩვენ გადავწყვიტეთ, რომ უკრაინა, მოლდოვა და საქართველო ამ გზაზე დადგებიან. მოლდოვა და უკრაინა კანდიდატის სტატუსის მქონენი არიან, ხოლო საქართველოს მიენიჭა ევროპული პერსპექტივა და 12 ვალდებულება განისაზღვრა, რომელიც ევროკომისიის დასკვნაშია გაწერილი. მიხარია, რომ საქართველო ამ ვალდებულებებს ასრულებს. ჩვენ იმედი გვაქვს, რომ განვიხილავთ ამ საკითხებს სამივე ქვეყანასთან მიმართებით და საქართველოსთან დაკავშირებით ვნახავთ პროგრესს ინსტიტუციურად და ევროკავშირის გზაზე წინსვლა გვექნება“,- აღნიშნა ანდრეი პლენკოვიჩმა.

ხორვატიის რესპუბლიკაში საქართველოს პრემიერ-მინისტრის, ირაკლი ღარიბაშვილის ოფიციალური ვიზიტი დაიწყო. მთავრობის სასახლეში საქართველოს პრემიერ-მინისტრის დახვედრის ოფიციალური ცერემონია გაიმართა. ვიზიტის ფარგლებში პრემიერ-მინისტრი მაღალი დონის ორმხრივ შეხვედრებს გამართავს. ასევე, ირაკლი ღარიბაშვილი ხორვატიის რესპუბლიკაში საქართველოს საელჩოს გახსნის ღონისძიებას დაესწრება.