შალვა პაპუაშვილი: როდესაც საქართველო ხდება დეზინფორმაციული თავდასხმის ობიექტი, ყოველ ჯერზე „ენჯეოები“ ან ჩუმად არიან, ან არიან მონაწილე ამ დეზინფორმაციის

დეზინფორმაცია არის თანამედროვე სამყაროს ერთ-ერთი გამოწვევა. სწორედ ამიტომაც არსებობს რამდენიმე „ენჯეო“, რომელიც მილიონებს იღებს უცხოურ დაფინანსებას თითქოს დეზინფორმაციის მხილებისთვის და ყოველ ჯერზე, როდესაც საქართველო ხდება დეზინფორმაციული თავდასხმის ობიექტი, ისინი ან ჩუმად არიან, ან არიან მონაწილე ამ დეზინფორმაციის, - ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

„გადახედეთ მათ მხილებებს. აბსოლუტურად ქარის წისქვილებს ებრძვიან თავის მხილებებში და საუბრობენ ისეთ საკითხებზე, რომელიც საზოგადოებისთვის აბსოლუტურად არ არის რელევანტური, ან ისეთი მავნე და ცუდი გავლენა არ აქვს, როგორც მაგალითად ამ სტიქიის დროს დეზინფორმაციის გავრცელებას. დეზინფორმაციის მიზანი ყოველთვის არის საზოგადოებაში დაბნეულობისა და პანიკის შეტანა, ხელისუფლების წინააღმდეგ განწყობა. ვხედავთ, რომ ამ დროს, ნაცვლად იმისა, რომ ეს დეზინფორმაცია ამხილონ, უფრო უარესს აკეთებენ ეს არასამთავრობოები. გუშინ ერთ-ერთი ჯგუფი არასამთავრობოებისა გამოეხმაურა ჩვენს მიერ მხილებებს და ეს შეაფასა როგორც თავდასხმა მედიაზე თუ არასამთავრობო ორგანიზაციაზე. ანუ გამოდის, რომ ტყუილი, ეს არის სიტყვის თავისუფლება და ტყუილის მხილება არის თავდასხმა. სწორედ ეს არის, როდესაც მე ვსაუბრობ ღირებულებით კრიზისზე, რომელიც ზოგიერთ ენჯეოს აქვს. ტყუილი არანაირად არ არის დაცული გამოხატვის თავისუფლებით და სწორედ ამიტომაც მნიშვნელოვანია ტყუილის მხილება და სწორედ ამიტომაც მნიშვნელოვანია, რომ ეს კორპორატივიზმი, რომელიც არსებობს არასამთავრობო სექტორში, რამდენიმე დომინანტური ენჯეო, რომელიც დომინირებს სხვა ენჯეოებზე და აქვთ შეკრული კორპორატივისტული ჯგუფი, რომელიც ცდილობს, რომ ყოველ ჯერზე, როდესაც არის სიმართლით მხილება ცდილობს შეტევას მამხილებელზე“, - განაცხადა შალვა პაპუაშვილმა.