გიორგი ტყემალაძე ოპოზიციაზე: ბევრი მაგალითი შეიძლება მოვიყვანოთ, როცა ანალოგიური პროექტების მიმართ არ გასჩენიათ არანაირი კითხვის ნიშნები, რადგან იქ არ ფიგურირებდნენ მათთვის პოლიტიკურად საინტერესო გვარები

ბევრი მაგალითი შეიძლება მოვიყვანოთ, როცა ანალოგიური პროექტების მიმართ არ გასჩენიათ არანაირი კითხვის ნიშნები, იმიტომ, რომ იქ არ ფიგურირებდნენ მათთვის პოლიტიკურად საინტერესო გვარები, - ამის შესახებ „ქრონიკის“ ეთერში თბილისის საკრებულოს თავმჯდომარემ, გიორგი ტყემალაძემ განაცხადა, რითაც დღევანდელ სხდომაზე ოპოზიციის მხრიდან გამოთქმულ კრიტიკას უპასუხა.

სატრანსპორტო პრობლემატიკაზე არის საუბარი და მოდით, ვნახოთ, რა ხდება „ლაგუნა ვერეს“ მიმდებარე ტერიტორიაზე და რა სატრანსპორტო პრობლემები არსებობს იქ დღეს. იქ არის ბენზინგასამართი სადგურები, სხვადასხვა ფუნქციის და დანიშნულების სავაჭრო ობიექტები - იქაურობა აბსოლუტურად მოწესრიგდება. საუბარი არის „ლაგუნა ვერეს“ საცურაო აუზის რეაბილიტაციაზე, ფაბრიკის ისტორიული შენობის შენარჩუნებაზე. საერთო ჯამში, ეს გადაწყვეტა, პირიქით, გააკეთილშობილებს და იქნება ქალაქისთვის ერთ-ერთი მნიშვნელოვანი პროექტი. ასევე არ მინდა, ისე გამოვიდეს, რომ ექსპერტების მხრიდან მოსაზრებებზე არ ვრეაგირებთ. რა თქმა უნდა, ვისმენთ და არის გარკვეულ ექსპერტთა ჯგუფები, რომლებსაც პროექტთან დაკავშირებით შეიძლება უარყოფითი მოსაზრებები ჰქონდეთ, თუმცა, ეს ყველაფერი არის მსჯელობის საგანი. ჩვენ ვემხრობით იმას, რომ მსჯელობა იყოს საქმიანი და ორიენტირებული იმაზე, რომ საბოლოო ჯამში პროექტი წარმოდგენილი იყოს საუკეთესო ვერსიით. ბევრი მაგალითი შეიძლება მოვიყვანოთ, როცა ანალოგიური პროექტების მიმართ არ გასჩენიათ არანაირი კითხვის ნიშნები, იმიტომ, რომ იქ არ ფიგურირებდნენ მათთვის პოლიტიკურად საინტერესო გვარები. ეს კიდევ ერთი ნათელი მაგალითია, რომ ეს არის მათი პოლიტიკური ინტერესი, საზოგადოება შეიყვანონ შეცდომაში“, - აღნიშნა ტყემალაძემ.