ირაკლი კობახიძემ კონსტიტუცია გემრიელ ნამცხვარს შეადარა

ირაკლი კობახიძემ ვენეციის კომისიის პლენარულ სხდომაზე საკონსტიტუციო რეფორმის შესახებ ისაუბრა და მადლობა გადაუხადა კომისიის პრეზიდენტს, მდივანს, სამდივნოსა და ექსპერტებს თანამშრომლობისთვის.

„ვენეციის კომისიამ განაცხადა, რომ ჩვენ გემრიელი ნამცხვარი გამოვაცხვეთ, მაგრამ არავის სურს მისი ჭამა. ოპოზიციური პარტიებისთვისაც და პრეზიდენტისთვისაც მარტივი პასუხი გვაქვს: ჩვენ ეს გემრიელი ნამცხვარი არა ოპოზიციური პარტიებისთვის ან პრეზიდენტისთვის, არამედ ქართველი ხალხისთვის გამოვაცხვეთ“, - ამის შესახებ პარლამენტის თავმჯდომარე ირაკლი კობახიძემ ვენეციის კომისიის პლენარულ სხდომაზე განაცხადა. 

კობახიძე საკონსტიტუციო რეფორმის საკითხზე ქართულ პოლიტიკურ ძალებს შორის კონსენსუსის მიუღწევლობასთან დაკავშირებით ვენეციის კომისიის წუხილს გამოეხმაურა და აღნიშნა, რომ ამის გამო მმართველი გუნდიც შეწუხებულია.

„რა თქმა უნდა, გაცილებით უკეთესი იქნებოდა თუ კონსენსუსი სხვადასხვა პოლიტიკურ ძალებს შორის მიღწეული იქნებოდა. ოპოზიციური პარტიები და საქართველოს პრეზიდენტი, რომელიც ოპოზიციაშია 2014 წლიდან, მხარს არ უჭერენ საკონსტიტუციო ცვლილებებს. საქართველოს მოქალაქეები ისარგებლებენ დემოკრატიის ძლიერი გარანტიებით, კანონის უზენაესობით, ადამიანის უფლებების დაცვით, ძლიერი პარლამენტით, მართლმსაჯულების დამოუკიდებლობით, ადგილობრივი თვითმმართველობით. კონსტიტუცია აუმჯობესებს დემოკრატიის სტანდარტებს და კანონის უზენაესობას ჩვენს ქვეყანაში“, - განაცხადა ირაკლი კობახიძემ.

პარლამენტის თავმჯდომარემ ხაზი გაუსვა საქართველოს კონსტიტუციაში ცვლილებების ძირითად შინაარსს.

„ჩვენი მთავარი მიზანი იყო კონსტიტუციის შესაბამისობაში მოყვანა ურთიერთგაწონასწორებისა და შეკავების პრინციპთან, ასევე, ადამიანის უფლებების დაცვის გარანტიებისა და კანონის უზენაესობის, დემოკრატიისა და სოციალური სახელმწიფოს პრინციპების გაძლიერება. საქართველოს მოქმედი კონსტიტუცია მთავრობას აძლევს შესაძლებლობას, პოლიტიკური ნების არსებობის შემთხვევაში, დაამყაროს ავტორიტარული რეჟიმი. ჩვენ გვინდა, გვქონდეს კონსტიტუცია, რომელიც აღკვეთს ნებისმიერი სახის ავტორიტარიზმის საფრთხეს გრძელვადიან პერსპექტივაში და გვჯერა, რომ ახალი დოკუმენტი უზრუნველყოფს ძლიერ გარანტიებს ამისთვის“, - განაცხადა კობახიძემ.

26 სექტემბერს საქართველოს პარლამენტმა ახალი კონსტიტუცია მესამე მოსმენით მიიღო. ამით ქვეყანაში კონსტიტუციური რეფორმის ათთვიანი პროცესი დასრულდა.