ირაკლი კობახიძე: უკეთესი იქნებოდა, რომ ევროკავშირს ჰქონდეს უფრო მკაფიო, დროში გაწერილი გეგმა კონკრეტული ქვეყნების გაწევრიანებასთან დაკავშირებით

უკეთესი იქნებოდა, რომ ევროკავშირს ჰქონდეს უფრო მკაფიო, დროში გაწერილი გეგმა კონკრეტული ქვეყნების გაწევრიანებასთან დაკავშირებით, - ამის შესახებ პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ ჟურნალისტებს განუცხადა.

„მიშელმა დაასახელა კონკრეტული წელი, 2030 წელი გაწევრიანების თვალსაზრისით, რაც ოპტიმიზმის საფუძველს იძლეოდა სულ მცირე ბალკანეთის ქვეყნებისთვის. თქვენ იცით, რომ მაკედონია უკვე 18 წელია ელოდება გაწევრიანებას და არის კანდიდატი ქვეყანა, თუმცა, დღემდე არ განიხილება აქტიურად მისი გაწევრიანების საკითხი. 2030 წელი ალბათ ეს იყო მაკედონიისთვის, სერბეთისთვის, მონტენეგროსთვის იმედისმომცემი განცხადება, თუმცა, მოგვიანებით ევროკომისიამ ესეც უარყო და აღნიშნა, რომ 2030 წელს გაწევრიანებაზე საუბარი არასწორია. როდესაც ქვეყანა 18 წელი ელოდება გაწევრიანებას და მას იმას ეუბნები, რომ 7 წლის თავზეც კი შეიძლება არ მოგენიჭოს წევრის სტატუსი, ეს რა თქმა უნდა, პესიმიზმის საფუძველს იძლევა. უკეთესი იქნებოდა, რომ ევროკავშირს ჰქონდეს უფრო მკაფიო, დროში გაწერილი გეგმა კონკრეტული ქვეყნების გაწევრიანებასთან დაკავშირებით“, - აღნიშნა კობახიძემ.

რაც შეეხება ამ საკითხზე ოპოზიციის განცხადებებს, კობახიძის თქმით, ქვეყნის პროგრესი ბევრად მნიშვნელოვანია, ვიდრე ოპოზიციის სპეკულაციებზე პასუხის გაცემა.

„ოპოზიცია ყოველთვის სპეკულირებს. სინამდვილეში ჩვენთვის მთავარია, რომ თანმიმდევრულად ვიაროთ წინ ევროპისკენ. ამისთვის ჩვენ გვჭირდება შესაბამისი რეფორმების განხორციელება, ეკონომიკური ზრდა. ყველა მიმართულებით ჩვენ გვაქვს ხელშესახები პროგრესი. ესაა მთავარი და არა იმ სპეკულაციებზე პასუხი, რომელსაც ოპოზიციის მხრიდან ვისმენთ“, - განაცხადა ირაკლი კობახიძემ.