რასა იუკნიავიჩენე: ნატოში საქართველოს გაწევრიანებაზე საუბარი ნაადრევი არ არის

ლიტველი დეპუტატის რასა იუკნიავიჩენეს განცხადებით, საქართველომ არ უნდა მისცეს მიზეზები და არგუმენტები სკეპტიკოს ქვეყნებს, რათა მათ ეს მიზეზები ნატო-ში საქართველოს გაწევრიანების წინააღმდეგ გამოიყენონ. ამის შესახებ დეპუტატი 1tv-სთან ინტერვიუში აცხადებს.

რასა იუკნიავიჩენეს მიაჩნია, რომ ნატო-ში საქართველოს სრულუფლებიან წევრობაზე საუბარი ნაადრევი არ არის, არამედ პირიქით, "რაც უფრო მალე მიიღებს საქართველო წევრობის სამოქმედო გეგმას, მით უფრო უკეთესი იქნება ნატო-სთვის და რუსეთის შეკავების პოლიტიკას ხელს შეუწყობს."

"მე, როგორც ლიტველი დეპუტატი განსხვავებულად ვფიქრობ. ჩემი აზრით, არსებული სიტუაცია უფრო ახდენს რუსეთის პროვოცირებას, ვიდრე ნატოს მკაფიო და მტკიცე სტრატეგია. მსჯელობა მიმდინარეობს. ორგანიზაციის წევრებს განსხვავებული პოზიციები აქვთ. საქართველომაც და უკრაინამაც მაქსიმალურად უნდა იაქტიურონ, არ უნდა დანებდნენ და გააკეთონ ყველაფერი მიზნის მისაღწევად. მთავარია, რომ ევროპული ქვეყნების პოლიტიკურმა მოსაზრებებმა თქვენი იმედგაცრუება არ გამოიწვიოს", - განაცხადა რასა იუკნიავიჩენემ.

რასა იუკნიავიჩენე საქართველოში სუამის მინისტერიალის ფარგლებში იმყოფება.

დეპუტატი დასძენს, რომ თუ საქართველო ევროპული დემოკრატიის ნაწილი და ჩვენი ოჯახის წევრი არ გახდება, ამით რუსეთი გაიმარჯვებს.

"ყველასთვის ნათელია, რომ რუსეთი აგრესიული ქვეყანაა. განსაკუთრებით ყირიმის არალეგალური ანექსიის შემდეგ. ყირიმის ანექსიამდე, რუსეთმა აგრესიული ნაბიჯები გადადგა საქართველოს წინააღმდეგ. სამწუხაროდ, 2008 წელს ყველამ ვერ გაანალიზა, რომ საქართველოსთან ომით, საბჭოთა კავშირის დაშლის შემდეგ, ევროპა ახალი რეალობის წინაშე დადგა. 

ყირიმის ანექსიამ და აღმოსავლეთ უკრაინაში დესტაბილიზაციამ ყველა შოკში ჩააგდო. საბედნიეროდ, დაიწყო მსჯელობა ნატო-სა და მთელი საერთაშორისო საზოგადოების უფრო რეალისტურ მიდგომაზე. ნატოს სურდა და სურს რუსეთთან კარგი ურთიერთობა, მაგრამ არ მოხდა რუსეთის დემოკრატიზაცია. ჩვენ სხვა რეალობის და გამოწვევების წინაშე ვართ", - განაცხადა ლიტველმა დეპუტატმა.