ირაკლი კობახიძე: „ნაცმოძრაობის“ დროს საკონსტიტუციო სასამართლო საერთოდ ვერ ასრულებდა ადამიანის უფლებების დაცვის ფუნქციას

„ნაცმოძრაობის“ დროს, საკონსტიტუციო სასამართლო საერთოდ ვერ ასრულებდა ადამიანის უფლებების დაცვის ფუნქციას - დღეს საკონსტიტუციო სასამართლო სათანადოდაა დაკავებული ქვეყანაში ადამიანის ძირითადი უფლებების დაცვით, - ამის შესახებ „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ განაცხადა.

„თქვენ ძალიან კარგად გახსოვთ საკონსტიტუციო სასამართლოს ისტორია საქართველოში. 2004-2012 წლები, როდესაც სააკაშვილსა და ადეიშვილს ჰქონდათ სრული კონტროლი საკონსტიტუციო სასამართლოზე. მაშინ პრაქტიკაც ისეთი იყო, რომ წელიწადში ზოგჯერ 4 გადაწყვეტილება გამოჰქონდა საკონსტიტუციო სასამართლოს. იმდენად ჰქონდა განეიტრალებული ეს ინსტიტუტი, რომელიც საერთოდ ვერ ასრულებდა ადამიანის უფლებების დაცვის ფუნქციას. ეს ვითარება რადიკალურად შეიცვალა 2012 წლის შემდეგ და ეს სტატისტიკაზეც პირდაპირ აისახება. 10-20-ჯერ არის გაზრდილი სტატისტიკა, რომელიც დაკავშირებულია საკონსტიტუციო სასამართლოს მიერ ადამიანის ძირითადი უფლებების დაცვასთან. 2016 წლამდე „ნაციონალური მოძრაობა“ დიდწილად ინარჩუნებდა კონტროლს საკონსტიტუციო სასამართლოზე. მაშინდელი საკონსტიტუციო სასამართლოს თავმჯდომარე ერთსა და იმავე კოლეგიას აწერდა პოლიტიკურად მათთვის მნიშვნელოვან საქმეებს, სადაც მას ეგულებოდა კლანის სამი წევრი, ესენი იყვნენ ვარძელაშვილი, ერემაძე და კოპალეიშვილი. წინასწარ იცოდა საკონსტიტუციო სასამართლოს თავმჯდომარემ თუ რა გადაწყვეტილებას გამოიტანდნენ ისინი. ეს იყო ის, რასაც აკეთებდა „ნაცმოძრაობა“ და რა კონტროლიც ჰქონდა მას სასამართლოზე. დღეს ეს კონსტიტუციური ორგანო არის თავიდან ბოლომდე დამოუკიდებელი, რაც აისახება სტატისტიკაზე, ასევე, გადაწყვეტილებების შინაარსზე. დღეს საკონსტიტუციო სასამართლო სათანადოდაა დაკავებული ქვეყანაში ადამიანის ძირითადი უფლებების დაცვით “,- აღნიშნა კობახიძემ.