გიორგი ვოლსკი: იდეა, რომ ოპოზიცია გარეთ იდგეს, ხალხი მოიყვანონ და სალომე ზურაბიშვილი გახდეს ლიდერი, ეს ჩადებული იყო თავიდანვე მის ქმედებებში

იდეა, რომ ოპოზიცია გარეთ იდგეს, ხალხი მოიყვანონ და სალომე ზურაბიშვილი გახდეს ლიდერი, ეს ჩადებული იყო თავიდანვე მის ქმედებებში, - ამის შესახებ პარლამენტის ვიცე-სპიკერმა, გიორგი ვოლსკიმ „ქრონიკაში“ განაცხადა,

„არ ვიცი პრეზიდენტს ოპოზიციის ახალ ლიდერად ვიხილავთ თუ არა, მაგრამ ჩვენს თვალწინ იმდენი რამ მოხდა - ეს საზღვარგარეთ ვოიაჟი, 26 მაისის სკანდალური განცხადება, ამ ფონზე მისი განცხადება, რომ საქართველომ სტატუსი უნდა მიიღოს, ოღონდ მთავრობამ არ უნდა მიიღოს. გაცხადებები, რომ ყველაფერს გააკეთებდა იმისთვის, რომ საქართველომ კანდიდატის სტატუსი მიიღოს. იდეა, რომ ოპოზიცია გარეთ იდგეს, ხალხი მოიყვანონ და იგი გახდეს ლიდერი, ეს ჩადებული იყო თავიდანვე [მის ქმედებებში]. მისი მხრიდან ეს ყველაფერი პოლიტიკური პლატფორმის ლიდერის ადგილის დაკავების მცდელობაა“, - აღნიშნა ვოლსკიმ.

პრეზიდენტის იმპიჩმენტის საკითხის განხილვა პარლამენტში ხვალ გაიმართება. მსჯელობა 12:00 საათზე დაიწყება.

„პარლამენტშიც მივალ და სხვათა შორის, იმ პატარა კაცებთან რომ დავდგე, არავინ მჭირდება მხარდასაჭერად. მე ვერავის ვერაფერს ვუკარნახებ, მაგრამ მინდა, ვურჩიო ოპოზიციას, რომ თუ უნდათ, რომ სურათი დადგეს ძლიერი, გარეთ დადგნენ და დადგნენ ამ ანტიევროპული იმპიჩმენტის წინააღმდეგ. შიგნით მე ვიქნები, მე გამოვალ, თუ სიტყვა მომცეს, თუ არადა მე გამოვალ ისედაც და ყველაფერს ვიტყვი, რაც არის სათქმელი“, - განაცხადა პრეზიდენტმა საკონსტიტუციო სასამართლოს მიერ გამოქვეყნებული დასკვნის შემდეგ, რომელმაც მის მიერ კონსტიტუციის დარღვევა დაადგინა.