იაგო ხვიჩია ირაკლი კობახიძეს: რას ერჩოდით ქართველ ხალხს? ფაქტობრივად ძალით თავს მოახვიეთ პრეზიდენტი, რომელსაც 1% ჰქონდა რეიტინგი და რომელიც თან კონსტიტუციას არღვევს

რას ერჩოდით ქართველ ხალხს? ფაქტობრივად ძალით თავს მოახვიეთ პრეზიდენტი, რომელსაც 1% ჰქონდა რეიტინგი, რომელიც თან კონსტიტუციას არღვევს, - ამის შესახებ „გირჩის“ წევრმა, დეპუტატმა იაგო ხვიჩიამ პრეზიდენტის იმპიჩმენტის საკითხზე მომხსენებელის ირაკლი კობახიძისთვის კითხვის დასმისას განაცხადა.

„ჩემი შეკითხვა ასეთია: ბატონო ირაკლი, თქვენ ბრძანეთ და ბოლო დღეების განმავლობაში ეს რიტორიკა ხშირად მოვისმინეთ „ქართული ოცნების“ ლიდერებისგან, რომ ჩვენ აგირჩიეთ პრეზიდინტი, რომელიც არავის უნდოდაო, ჩაგენაცვლეთ ბილბორდებშიო, კარგი საქმე გაგიკეთეთო. მესმის, აბსოლუტურად გეთანხმებით ამ ყველაფერში, მართალს საუბრობთ. მაგრამ რატომ გააკეთეთ ეს?! ანუ ეს მაინტერესებს, რას ერჩოდით ქართველ ხალხს. აქ ითქვა კიდეც, ვიღაცამ პროცენტიც დაასახელა, ერთი პროცენტი ჰქონდა მაშინ პრეზიდენტს რეტინგიო. რატომ გააკეთეთ, რატომ ჩაიდინეთ ქართველი ხალხის წინაშე ასეთი შეცდომა, რომელსაც ფაქტობრივად ძალით თავს მოახვიეთ პრეზიდენტი, რომელსაც ერთი პროცენტი ჰქონდა, რომელიც თან კონსტიტუციას არღვევს. როგორც დღეს ვხედავთ, ვერ მოხდება პრეზიდნეტის იმპიჩმენტი და ფაქტობრივად, ქართველი ხალხი უნდა შეეგუოს თქვენ მიერ თავსმოხვეულ ერთპროცენტიან პრეზიდენტს, რომელიც თან კონსტიტუციას არღვევს ფიზიკურად და ეს რატომ გააკეთეთ, რა მოტივაცია არსებობდა ისეთი. სავარაუდოდ, როგორც იურისტი მეტყვით, რომ მიზანშეწონილობის პრინციპიდან გამომდინარე, ასე იყო, რადგან ნაცები მოდიოდნენო და ასე შემდეგო. ჩემი მეორე შეკითხვაც ეგ არის, თუ მაშინ მიზანშეწონილობის პრინციპით მოქმედებდით, დღეს სად წავიდა ეს მიზანშეწონილობის პრინციპი, როდესაც ბატონი ბორელი იყო ჩამოსული, როდესაც ევროინტეგრაციის პროცესში გვეუბნებიან, ახლა არ იყო ამის დროო. შეგნებულად რომ აირჩიეთ პრეზიდენტი, რომელიც ფაქტობრივად თქვენივე რიტორიკით თავსმოხვეული გამოდის, ეს თუ იხსნება მიზანშეწონილობით, დღეს რატომ დგება ეს ყველაფერი, რომ სასწრაფოდ ახლა უნდა ყოფილიყო ეს იმპიჩმენტი და მეორე, ეს უფლებამოსილებები პრეზიდენტის, რომელმაც ასეთი კამათი გამოიწვია და ვერ გავარკვიეთ პრეზიდენტის უფლებამისილება რა იყო და რა არ იყო, თავის დროზე თქვენ როგორ გქონდათ წარმოდგენილი, როცა კონსტიტუციას წერდით?!“, - აღნიშნა იაგო ხვიჩიამ.

პარლამენტში პრეზიდენტის იმპიჩმენტის საკითხის განხილვა დაიწყო.სხდომას ესწრება თავად სალომე ზურაბიშვილი.

საქართველოს პრეზიდენტმა კონსტიტუცია დაარღვია. ეს გადაწყვეტილება საკონსტიტუციო სასამართლომ პრეზიდენტის საიმპიჩმენტო წარდგინებასთან დაკავშირებით 2023 წლის 16 ოქტომბერს გამოაცხადა.