ნიკოლოზ სამხარაძე: ყველა მოქალაქეს ვულოცავ ამ ძალიან დიდ გადაწყვეტილებას, რომელიც გვაახლოებს ევროკავშირის საბოლოო წევრობასთან

საქართველოს ყველა მოქალაქეს ვულოცავ ამ ძალიან დიდ გადაწყვეტილებას, რომელიც გვაახლოებს ევროკავშირის საბოლოო წევრობასთან. ეს არის ძალიან მძიმე და მრავალწლიანი შრომის შედეგი, რომელიც გასწიეს როგორც ხელისუფლებამ, მთავრობამ და პარლამენტმა, ასევე საჯარო მოხელეებმა და რა თქმა უნდა, სასიხარულოა, რომ ეს შრომა დაფასდა ევროკომისიის მიერ და გაიცა დღეს რეკომენდაცია საქართველოსთვის კანდიდატის სტატუსის მინიჭებასთან დაკავშირებით, - ამის შესახებ პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ „ქარონიკაში“ განაცხადა.

„რა თქმა უნდა, ეს არის ერთი მხრივ პროცესის დაგვირგვინება, თუმცა, მეორე მხრივ ეს არის ახალი ეტაპის დასაწყისი და ამ ახალ ეტაპზე ჩვენ მოგვიწევს კიდევ უფრო მეტი რეფორმის გატარება, კიდევ უფრო მეტი ძალისხმევის გაღება იმისთვის, რომ საქართველო საბოლოოდ დავუახლოოთ ევროპულ სტანდარტებს და იმისთვის, რომ საქართველოს გახდეს ევროკავშირის წევრი ქვეყანა. დღეს არის ნამდვილად სასიხარულო დღე. ჩვენ უნდა ვიყოთ ამაღლებულ განწყობაზე, რადგან ჩვენი შრომა დაფასდა და მოვემზადოთ უკვე შემდგომი ნაბიჯებისთვის“, - განმარტა ნიკოლოზ სამხარაძემ.